Ukraynada yaşayan azərbaycanlılardan dövlətə dəstək gəldi

Ukrayna baş nazirinin müavini Aleksandr Siç Nazirlər Kabinetində ölkədə yaşayan etnik xalqların nümayəndələri ilə görüş keçirib. Lent.az-ın məlumatına görə, Ukrayna Millətlər Assambleyasının (UMA) prezidenti Rövşən Tağıyev də iştirak edib.

Görüşdə çıxış edən Rövşən Tağıyev Ukraynanın bütövlüyünün qorunub saxlanmasının vacibliyini vurğulayıb. O, ölkənin şərqində baş verən hadisələr fonunda ölkənin parçalanmasının qarşısının alınması istiqamətində güclərin birləşdirilməsinin vacibliyindən danışıb. Tağıyev Ukrayna vətəndaşı olan azərbaycanlıların buna hazır olduğunu bildirib.

R. Tağıyev həmçinin təkliflə də çıxış edib. O, bildirib ki, Ukraynanın əvvəlki prezidentinin dövründə ləğv olunan milli azlıqlarla bağlı Mərkəzi İcra Orqanı bərpa olunsun: “Çünki bu strukturun fəaliyyəti etnik xalqların, o cümlədən Ukraynada yaşayan azərbaycanlıların bütün dövlət orqanlarında maraqlarının təmin olunmasına yönəlmişdi”.

Tədbirdən sonra Aleksandr Siç Rövşən Tağıyev ilə təkbətək görüş keçirib. Görüşdə Ukraynadakı Azərbaycan diasporunu narahat edən məsələlər müzakirə edib.