Sevinc Babayevanın ailəsindən qadağa

Sevinc Babayevanın ailəsi “Medicana İnternational” klinikasına məsələ ilə bağlı məlumat verməyi qadağan edib. Klinikadan Lent.az-a bildirilib ki, S.Babayevanın ailəsi bu məsələ ilə bağlı yalnız Azərbaycanın İstanbuldakı Baş konsulluğunun məlumat verməsini istədiklərini bildirib: “Onlar bizə bildirdilər ki, məlumat verməyək. Bütün məlumatları konsulluq açıqlayacaq”.

Xatırladaq ki, klinikadan bir qədər əvvəl açıqlama veriləcəyini bildirmişdilər.

Qeyd edək ki, Sevinc Babayevanın Türkiyədə hospitallardan birində öldüyü artıq təsdiqlənib. APA-nın Türkiyə bürosunun xəbərinə görə isə S. Babayeva dünən səhər saatlarında İstanbulun Bəylikdüzü səmtində yerləşən “Medicana İnternational” Klinikasına müraciət edib. O, bir neçə saat sonra həmin klinikada vəfat edib. Xəstəxanadan APA-nın yerli bürosuna Sevinc Babayeva adlı şəxsin vəfat etdiyini təsdiqləyiblər. Hazırda Azərbaycanın İstanbuldakı Baş Konsulluğunun əməkdaşları xəstəxanadırlar. İstanbul polisindən isə onlara hələ də bu barədə hər hansı məlumat daxil olmadığını bildiriblər.

Onu da qeyd edək ki, Azərbaycan Beynəlxalq Universitetinin (ABU) sabiq rektoru Elşad Abdullayevin yaydığı qalmaqallı videoda vasitəçi qismində adı hallanan Sevinc Babayevanın dünyasını dəyişməsi haqqında məlumat dünən yayılıb.

Baş Prokurorluğun mətbuat xidmətinin rəhbəri Eldar Sultanov Lent.az-a açıqlamasında bildirib ki, Məmmədov Ayxan Eldar oğlu dekabrın 27-də saat 16:00-da Bakı şəhər prokurorluğuna zəng edərək, anası Sevinc Babayevanın Türkiyənin İstanbul şəhərində fəaliyyət göstərən hospitallardan birində ürək xəstəliyindən vəfat etdiyini bildirib.