Şəkidə "VAZ" “Muravey”lə toqquşub: yaralanan var

Şəki rayonunda yol qəzası baş verib. Daxili İşlər Nazirliyinin (DİN) Baş Dövlət Yol Polisi İdarəsinin istintaq və təhqiqat bölməsindən APA-nın Şəki-Zaqatala bürosuna verilən məlumata əsasən, hadisə Yevlax-Zaqatala-Gürcüstan magistral yolunun 32-ci kilometrliyində, Şəki rayonun Suçma kəndi ərazisindən keçən hissəsində baş verib.

Əslən Laçın rayonunun Daşlıx kəndindən olan, hazırda isə Şəki rayonu Çələbixan qəsəbəsində məskunlaşmış məcburi köçkün İsmayılov Məhəbbət Şaiq oğlunun idarə etdiyi “VAZ 21154” markalı 45-BD-580 dövlət nömrə nişanlı avtomobil Mingəçevir istiqamətində hərəkətdə olarkən, eyni istiqamətdə hərəkət edən Şəki rayon Şəki kənd sakini Məmmədov Ziyafət Ziyad oğlunun idarə etdiyi “Muravey” markalı motosikletlə toqquşub. Hadisə nəticəsində müxtəlif dərəcəli bədən xəsarətləri alan “Muravey”in sürücüsü Ziyafət Məmmədov Şəki Mərkəzi Şəhər Xəstəxanasına (MŞX) yerləşdirilib.

Şəki MŞX-dan APA-ya verilən məlumata görə, Ziyafət Məmmədovun vəziyyəti orta-ağır hesab olunur, müalicəsi xəstəxananın cərrahiyyə şöbəsində davam etdirilir.

Fakla bağlı DİN-nin Baş Dövlət Yol Polisi İdarəsinin istintaq və təhqiqat bölməsində araşdırma aparılır.