Səfər Əbiyev Yunanıstan səfiri ilə görüşdü

Oktyabrın 2 - də müdafiə naziri general-polkovnik Səfər Əbiyev Yunanıstan Respublikasının Azərbaycandakı fövqəladə və səlahiyyətli səfiri Dimitrios Tsounqası qəbul edib. Lent.az-ın məlumatına görə, yeni səfiri təyinatı münasibəti ilə təbrik edən müdafiə naziri Yunanıstan-Azərbaycan əlaqələrinin inkişaf etdirilməsinin vacibliyini qeyd edib.

Gorus Zamani səfir bütün sahələr üzrə ölkələrarası əməkdaşlığın möhkəmləndirilməsində səylərini əsirgəməyəcəyini bildirib.

Beynəlxalq təşkilatların, Avropanın aparıcı dövlətlərinin, xüsusilə Minsk Qrupunun Dağlıq Qarabağ münaqişəsinin danışıqlar yolu ilə həlli üçün fəaliyyətlərini gücləndirmələrinə ciddi ehtiyac olduğunu bildirən Səfər Əbiyev əks təqdirdə bölgədə arzu olunmayan ağır problemlərin yaranacağını vurğulayıb.

Görüş zamanı digər məsələlər barədə də fikir mübadiləsi aparılıb.