Sabiq hakimə 600 min manat verən şəxsin ifadəsində ZİDDİYYƏT

Bu gün Gəncə Ağır Cinayətlər Məhkəməsində dələduzluq və rüşvət verməkdə təqsirləndirilən keçmiş hakim Həsən Əliyev, eləcə də Elman Məmmədov və Taleh Süleymanovun barəsindəki cinayət işi üzrə məhkəmə prosesi davam etdirilib. Lent.az-ın məlumatına görə, hakim Mübariz Məmmədovun sədrliyi ilə keçirilən prosesdə zərərçəkən Ramazan Səlimovun ibtidai istintaqa və məhkəməyə verdiyi ifadələr arasındakı ziddiyyətlər araşdırılıb. R.Səlimov daha sonra dövlət ittihamçısının suallarını cavabalandırıb.

Qeyd edək ki, Rusiyadan gələn iş adamı Ramazan Səlimov Azərbaycanda “yaxşı” işə düzəlmək üçün 2011-ci ildən tanıdığı Elman Məmmədova müraciət edib. Elman Məmmədov isə onu Bakı Ağır Cinayətlər Məhkəməsinin hakimi Həsən Əliyevlə görüşdürüb. Həsən Əliyev də Ramazan Səlimovdan onu işə düzəltmək adı ilə 600 min manat pul alıb. Lakin sonradan nə işi həll edib, nə də pulu qaytarıb. Bundan sonra Ramazan Səlimov polisə şikayət edib. Şikayət əsasında cinayət işi başlanılıb və Elman Məmmədov həbs edilib. İstintaq dövründə Həsən Əliyevə qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq törətmə) maddəsi ilə bərabər Cinayət Məcəlləsinin 312-ci (rüşvət vermə) maddəsi ilə də ittiham elan olunub. Lakin barəsində həbs-qətimkan tədbiri seçilməyib.

Onu da qeyd edək ki, prezident İlham Əliyev bu il fevralın 11-də Həsən Əliyevin səlahiyyətlərinə vaxtından əvvəl xitam verilməsi haqqında sərəncam imzalayıb. Buna səbəb kimi Həsən Əliyevin qanunvericiliyin tələblərini dəfələrlə kobudcasına pozması göstərilib.