Ramil Usubov türkiyəli həmkarı ilə görüşüb

Daxili işlər naziri, general-polkovnik Ramil Usubov Türkiyə Respublikasının daxili işlər naziri Efkan Alanın başçılıq etdiyi nümayəndə heyətini qəbul edib. Daxili İşlər Nazirliyindən Lent.az-a verilən xəbərə görə, ölkəmizə iki günlük rəsmi səfərə qonaqları salamlayan R.Usubov türkiyəli həmkarını yeni təyinat münasibətilə təbrik edib və birinci xarici səfərini Azərbaycana etdiyinə görə ona təşəkkürünü bildirib.

Dövlət rəhbərlərinin siyasi iradəsi və qarşılıqlı səfərləri nəticəsində dost və qardaş ölkələrimiz arasındakı münasibətlərin keyfiyyətcə yeni mərhələyə qədəm qoyduğunu vurğulayan R.Usubov rəhbərlik etdiyi qurumun Türkiyənin hüquq-mühafizə orqanları ilə münasibətlərin daha da inkişaf etdirilməsinə böyük önəm verdiyini bildirib.

E.Alan rəsmi dəvətə, təbrikə və göstərilən qonaqpərvərliyə görə minnətdarlığını bildirib. Qonaq iki ölkənin daxili işlər nazirlikləri arasında qarşılıqlı, faydalı və səmərəli əməkdaşlığın gələcəkdə daha da inkişaf etdirilməsinin vacibliyini qeyd edib.

Görüşdə tərəfləri maraqlandıran bir sıra digər məsələlər də müzakirə edilib.