Qəhrəmanlar Unudulmur – Milli Qəhrəman Səyavuş Həsənov

Qarabağ Azadlıq Təşkilatı və Milli Qəhrəmanları Tanıtma İctimai Birliyi Azərbaycanın ərazi bütövlüyü uğrunda vuruşmuş Milli Qəhrəmanların cəmiyyətə bir daha təqdim olunması üçün təşəbbüs irəli sürüb.

Lent.az da bu təşəbbüsə qoşulur və Milli Qəhrəmanların doğum günlərində onlar haqqında məlumatları dərc edir.

Qəhrəmanlar unudulmur!

20 yanvar Milli Qəhrəman Səyavuş Həsənovun doğum günüdür. Səyavuş Həsən oğlu Həsənov Şərur rayonu Yenicə kəndində anadan olub, xalq hərəkatında fəal iştirak edib, könüllü batalyonun tərkibində Qazax, Goranboy, Gədəbəy, Şuşa və digər istiqamətlərdə sücaətlə vuruşub, 1992-ci ildə polis sıralarına daxil olub. Polis dəstəsində Ağdərənin kəndlərinin azad olunmasında fəal iştirak edib, 1992-ci il iyunun 25-də Qırmızıkənd istiqamətində döyüşdə düşmənin bir tankını qumbara ilə sıradan çıxarıb və qəhrəmanlıqla həlak olub. 1992-ci il iyulun 21-də Milli Qəhrəman adına layiq görülüb.

Bakı şəhərində Şəhidlər Xiyabanında dəfn edilib.