Naxçıvanın sabiq MTN naziri özünü təqsirli bilmir

Bu gün Naxçıvan Hərbi Məhkəməsində sabiq milli təhlükəsizlik naziri Vəli Ələsgərovun cinayət işi üzrə məhkəmə prosesi keçirilib. Lent.az-a bu barədə vəkil Vüqar Xasayev məlumat verib. O, bildirib ki, proses qapalı keçirilir: "Məhkəmə istintaqı başlayıb. Prokuror ittiham aktının nəticəvi hissəsini elan edib. Vəli Ələsgərov ittiham üzrə özünü təqsirli bilməyib. O, məhkəmədə ifadə verib".

Proses sabah davam edəcək.

Qeyd edək ki, V. Ələsgərov 15 il Naxçıvan Muxtar Respublikasının milli təhlükəsizlik naziri vəzifəsində çalışıb. O, vəzifə səlahiyyətlərini aşmaqda, dövlət əmlakını talamaqda və digər cinayətlərdə ittiham olunur. V. Ələsgərov bir müddət əvvəl Naxçıvanda həbs edilib. Daha sonra barəsində seçilmiş həbs qətimkan tədbiri ev dustaqlığı ilə əvəz edilib. Daha sonra onun barəsində yenidən həbs qətimkan tədbiri seçilib.