Mehriban Əliyevanın sədrliyi ilə iclas olub

2015-ci ildə Bakıda keçiriləcək ilk Avropa Oyunlarının Təşkilat Komitəsinin iyunun 25-də ikinci iclası olub.

APA-nın məlumatına görə, Təşkilat Komitəsinin sədri Mehriban Əliyeva iclasda iştirak edib.

M. Əliyeva qarşıda duran vəzifələrdən danışaraq bildirib ki, ilk iclas bu il fevralın 2-də prezident İlham Əliyevin rəhbərliyi ilə keçirilib: “Bu fakt özlüyündə onu göstərir ki, dövlət bu oyunların hazırlanmasına və keçirilməsinə çox böyük diqqətlə yanaşır. Birinci görüşümüzdən ötən dövr ərzində bir sıra hazırlıq işləri həyata keçirilib. Qarşımızda duran məsələlərin həlli istiqamətlərində tədbirlər görülüb. Eyni zamanda, yeni çağırışlar, yeni məsələlər ortaya çıxır. Ümidvaram ki, bugünkü görüşdə biz bütün bu sualları birlikdə müzakirə edəcəyik.

Təşkilat Komitəsinin üzərinə çox böyük məsuliyyət düşür. Bildiyiniz kimi, 2015-ci ildə ölkəmizdə ilk dəfə Avropa Oyunları keçiriləcək. Bu vaxta qədər tarixdə belə tədbir keçirilməyib. Baxmayaraq ki, ümumiyyətlə Olimpiya hərəkatı Avropada doğulub və sonra yenidən Avropada bərpa olunub, digər qitələrdə qitə oyunları keçirilirdi, Avropada isə ilk dəfə belə oyunların keçirilməsi şərəfi bizə nəsib olub. Biz çalışmalıyıq ki, bu oyunlar ən yüksək səviyyədə hazırlansın və ən yüksək səviyyədə keçirilsin. Ümumiyyətlə, bu, Avropanın idman hərəkatının tarixində yeni bir dövrün başlanmasıdır və Azərbaycan bu tarixin ilk səhifələrini yazan ölkədir.

Mən qeyd etmək istərdim ki, hazırlıq üçün cəmi iki il vaxtımız var. Daha dəqiq olsam, oyunların başlanmasına 98 həftə qalıb. Bu, o deməkdir ki, vaxt çox azdır. Ona görə biz gərək daha da fəal işləyək və dövlətin qarşımızda qoyduğu məsələlərin icrası üçün əlimizdən gələni edək. Mən əminəm ki, buna nail olacağıq”.

İclasda ümumi baxışı və atletlər kəndinin master planını təqdim edən gənclər və idman naziri Azad Rəhimov Olimpiya kəndində aparılan işlərdən danışıb. Bildirib ki, təxminən 7 min 300 atletin Olimpiya kəndində qalması, qidalanması və istirahəti üçün bütün şərait yaradılacaq. Bu məsələ ilə bağlı xarici və yerli mütəxəssislərin birgə çalışdığını deyən A. Rəhimov Təşkilat Komitəsinin ilk iclasından sonra keçən dövrdə Avropa Oyunları ilə bağlı 18 Anlaşma Memorandumunun imzalandığını, oyunlarda 18 idman növünün təmsil olunacağını, daha iki idman növü üzrə memorandumların imzalanacağının gözlənildiyini bildirib.

M. Əliyeva oyunlara hazırlıqla bağlı infrastruktur məsələlərinin həllinin vacibliyini bildirib, idman qurğularının monitorinqinin aparıldığını qeyd edib.

Əmlak Məsələləri Dövlət Komitəsinin sədri Kərəm Həsənov Olimpiya kəndində həyata keçirilən tədbirlərin bir neçə mərhələdə reallaşacağını deyib.

Avropa Oyunları üzrə işçi qrupunun icraçı məsləhətçisi Daq Arnot planlaşdırma prosesi barədə məlumat verib, gələn həftədən kütləvi informasiya vasitələri ilə əməkdaşlığa başlanılacağını qeyd edib.

Avropa Oyunlarının təhlükəsizlik üzrə məsləhətçisi, Avropa Oyunları üzrə işçi qrupunun üzvü Peter Aşvin 17 gün ərzində keçiriləcək oyunların planlaşdırma mərhələsində təhlükəsizlik məsələlərinin nəzərdən keçiriləcəyini deyib, təhlükəsizliyin dizaynının yaradılması, risklərin idarə edilməsi və nəzarət sistemlərinin yeni nəslinin tətbiqindən danışıb.

Nəqliyyat naziri Ziya Məmmədov nəqliyyat-yol kompleksi ilə bağlı tədbirlər planı layihəsinin hazırlandığını, bununla əlaqədar 13 layihənin müəyyənləşdirildiyini diqqətə çatdırıb.

Milli təhlükəsizlik naziri Eldar Mahmudov kütləvi tədbirlər zamanı təhlükəsizlik məsələlərinə sistemli şəkildə yanaşılacağını bildirib.

Daxili işlər naziri Ramil Usubov Avropa Oyunları ilə bağlı hazırlanan fəaliyyət planının icrasına artıq başlanıldığını, xüsusi texniki vasitələrin alındığını vurğulayıb.

Prezident Administrasiyası rəhbərinin müavini Əli Əsədov həyata keçiriləcək tədbirlərin əhəmiyyətini və həcmini nəzərə alaraq qarşıdakı vəzifələrin icrasına dərhal başlanılmasının vacibliyini qeyd edib.

Maliyyə naziri Samir Şərifov oyunların keçirilməsinə dair hər bir istiqamət üzrə maliyyə planlaşdırılmasının əhəmiyyətinə toxunub.

Avropa Oyunlarının Təşkilat Komitəsinin ikinci iclasına yekun vuran M. Əliyeva aidiyyəti qurumlar arasında geniş və sıx əməkdaşlığın qurulmasının vacibliyini vurğulayıb. “İdman ölkəsi kimi tanınan Azərbaycanda irimiqyaslı idman tədbirləri keçirilir. Bununla bağlı beynəlxalq mütəxəssislərin rəyləri də yüksəkdir”, - deyən Təşkilat Komitəsinin sədri əminliklə bildirib ki, Azərbaycan Avropa Oyunlarına ev sahibliyi etmək üzrə birinci olmaq vəzifəsini layiqincə yerinə yetirərək oyunları yüksək səviyyədə keçirəcək.

Qeyd edək ki, tarixdə ilk Avropa Oyunları 2015-ci ilin iyununda Bakıda baş tutacaq. Bu ilin yanvarında yaradılan Təşkilat Komitəsində dövlət qurumlarının nümayəndələri ilə yanaşı, Milli Olimpiya Komitəsinin üzvləri, idmançılar və digər şəxslər təmsil olunur.