Quduz itin hücumuna məruz qalan 4 yaşlı uşaqdan YENİ XƏBƏR

Aprelin 18-də Binəqədi rayonunun Sulutəpə qəsəbəsində itin hücümuna məruz qalan 2015-ci il təvəllüdlü Məmişov Hüseyn Qismət oğlunundan yeni xəbər var.

1 saylı Kliniki Tibbi Mərkəzdən Lent.az-a verilən məlumata görə, xəstənin vəziyyəti yaxşı olduğu üçün o, artıq xəstəxanadan çıxıb. “Burada bütün lazımi müalicələr aparıldı. Uşağın vəziyyəti yaxşı olduğu üçün xəstəxanadan evə buraxılıb. Hazırda “Dünyagöz” klinikasında müalicə alır”.

Uşağın vəziyyəti ilə bağlı “Dünyagöz” klinikası ilə də əlaqə saxladıq.

Klinikadan Lent.az-a bildirldi ki, o, gözündə qansızma olduğu üçün həmin xəstəxanaya aparılıb. “Mayın 3-də xəstəxanamıza daxil olub. Göz qapağında hərəkət zəifliyi və qansızma qeydə alınıb. Həkim dərman yazıb, 10 gün ərzində yenidən müayinə olunacaq. Ümumilikdə vəziyyəti normaldır. Ciddi heç bir problem müşahidə olunmayıb”.

Qeyd edək ki, aprelin 18-də Binəqədi rayonunun Sulutəpə qəsəbəsində 4 yaşlı Hüseyn Məmişov quduz itin hücumuna məruz qalıb.