FHN Gürcüstanda itən Marneuli sakininin axtarışına başladı

Gürcüstanda itkin düşən şəxsin meyiti Qazaxda axtarılır.

Fövqəladə Hallar Nazirliyindən Lent.az-a verilən məlumata görə, fevralın 28-də Gürcüstan Daxili İşlər Nazirliyinin Fövqəladə Halların İdarəedilməsi Agentliyindən Azərbaycan Fövqəladə Hallar Nazirliyinə daxil olan məktubda Marneuli rayonunun İkinci Kosalı kənd sakini, 1952-ci il təvəllüdlü Əli Osmanovun (Gürcüstan Respublikasının vətəndaşı) fevralın 25-də naməlum şəraitdə itkin düşdüyü bildirilir. Ə.Osmanova məxsus avtomobil Kür çayının yaxınlığında tapıldığı üçün Gürcüstan xilasediciləri tərəfindən çayda axtarışlar aparılır. Fövqəladə Halların İdarəedilməsi Agentliyinin müraciətinə əsasən, bu gün səhər saatlarında Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu Kür çayının Qazax rayonu ərazisindən keçən hissəsində axtarışlara cəlb olunub.