Göyçayda reyd keçirilib

Göyçayda limonad istehsal edən müəssisədə ciddi qanun pozuntuları aşkar edilərək onun fəaliyyətinə məhdudiyyət qoyulub. Lent. az-ın məlumatına görə, Standartlaşdırma, Metrologiya və Patent üzrə Dövlət Komitəsinin Yevlax Ərazi İdarəsinin əməkdaşları Göyçayda limonad sexlərində reyd keçiriblər. Məlumata görə rayonun Cəyirli kəndində fəaliyyət göstərən, fiziki şəxs Quliyev Seymur Ziyad oğluna məxsus spirtsiz içki istehsal olunan sexə baxış keçirilərkən orada ciddi qanun pozuntuları aşkar edilib. Reyd zamanı limonad istehsal edən müəssisənin uyğunluq və gigiyenik sertifikatlarının, resepturanın olmadığı, ölçü vasitələrinin yoxlamadan keçmədiyi, sanitar normalara əməl edilmədiyi aşkar edilib. Bundan əlavə mütəxəssislərin rəyinə əsasən sexdə texnoloji reqlamentə əməl edilmir və müəssisə limonad istehsalı üçün yararsız sayılır. Komitənin əməkdaşları sexə iradnamə və tələbnamə yazıb, inzibati protokol tərtib ediblər, istehsala və satışa məhdudiyyət qoyublar.

Reydlər davam etdirilir.