Gömrükçülərimiz 15 narko-qrup zərərsizləşdirib

Narkotiklərin qanunsuz dövriyyəsi ilə məşğul olan 15 narko-qrup zərərsizləşdirilib. Bu barədə Lent.az-a Dövlət Gömrük Komitəsindən məlumat verilib. Gömrük Sahəsində Hüquqpozmalara Qarşı Mübarizə Baş İdarəsi tərəfindən 4 fakt üzrə 61 kq 660 qram, Biləsuvar Gömrük İdarəsi tərəfindən 51 fakt üzrə 44 kq 889 qram, Astara Gömrük İdarəsi tərəfindən 22 fakt üzrə 20 kq 713 qram, Hava Nəqliyyatında Baş Gömrük İdarəsi tərəfindən 2 fakt üzrə 3 kq 242 qram, Bakı Baş Gömrük İdarəsi tərəfindən 1 fakt üzrə 939 qram, Xaçmaz Gömrük İdarəsi tərəfindən 1 fakt üzrə 80 qram, Culfa Gömrük İdarəsi tərəfindən 2 fakt üzrə 26 qram, Naxçıvan DGK tərəfindən 1 fakt üzrə 3 qram narkotik vasitə və psixotrop maddə qanunsuz dövriyyədən götürülüb.

2012-ci il ərzində gömrük sərhəd keçid məntəqələrində xidmət göstərən instruktor-kinoloqlar tərəfindən onlara təhkim olunmuş xidməti axtarış itlərin tədbiqi nəticəsində 11 fakt üzrə 3 kq 537 qram narkotik, o cümlədən 71,13 qram həşiş, 2 kq 364 qram tiryək, 1 kq 86 qram heroin, 2,382 qram metamfetamin, 14 qram marixuana və 110 qutu müxtəlif dərman vasitələri aşkar olunub.

Ötən il ərzində aşkar olunmuş 14334 gömrük qaydaları əleyhinə inzibati xəta faktları üzrə 373 hüquqi şəxs (o cümlədən 165 xarici hüquqi şəxs) və 13945 fiziki şəxs (o cümlədən 8827 xarici) inzibati məsuliyyətə cəlb edilib, göstərilən şəxslərə qarşı 1 milyon 172 min 525 manat cərimə tətbiq olunmaqla, dəyəri 182 min 352 manat olan mallar müsadirə edilib.