Elşad Abdullayev daha bir video yayıb - YENİLƏNİB

Fəaliyyəti dayandırılmış Azərbaycan Beynəlxalq Universitetinin (ABU) hazırda Fransada olan sabiq rektoru Elşad Abdullayev bu gün daha bir video görüntü yayıb.

APA-nın xəbərinə görə, E. Abdullayevin yaydığı video görüntü 2004-cü ilin noyabrında qeydə alınıb.

Video görüntüdə Daxili İşlər Nazirliyinin polkovniki Rasim İldırımzadə ilə Elşad Abdullayev arasında ikincinin qardaşı Mahir Abdullayevin itkin düşməsi və geri qaytarılması ilə bağlı danışıq əksini tapıb.

R. İldırımzadə M. Abdullayevin Azərbaycanın qonşuluğundakı ölkələrdən birində olduğunu, sərbəst həyat tərzi sürdüyünü, bir neçə il ölkəyə gəlməsinin, yaxınları ilə əlaqə saxlamasının mümkünsüzlüyünü deyir. O bildirir ki, M. Abdullayevlə bağlı hadisə kriminal olay deyil, o oğurlanmayıb. Sadəcə, M. Abdullayev özü bir neçə il üzə çıxmaq, ölkəyə gəlmək istəmir və bununla bağlı özünün səbəbləri var.

Amma E. Abdullayevin israrlarına baxmayaraq, R. İldırımzadə bu informasiyaları haradan əldə etdiyini, M. Abdullayevin harada olması, niyə ailəsi ilə əlaqə saxlamamasının səbəbi barədə məlumat vermir. O, bu sualların hamısına “özü gəlib sənə ətraflı danışacaq, sonra istəsən onu xaricə göndərərsən” deyə, cavab verir.

O, M. Abdullayevi ayın sonuna qədər ( 2004-cü il noyabr ayının sonu nəzərdə tutulur-red) geri qaytaracağını deyib, E. Abdullayevdən israrla qardaşını ondan istəməsini xahiş edir. R. İldırımzadə həm də dəfələrlə E. Abdullayevdən “son məqamda onu pərt vəziyyətdə qoymamağı” da xahiş edir.

***

22.31

Hazırda Fransada olan ABU-nun sabiq rektoru Elşad Abdullayev 20 fevral, axşam saatlarında yeni video paylaşacağı ilə bağlı anons verib. Bu barədə “Yeni Müsavat”ı E. Abdullayevlə bağlı araşdırma aparan Elnur Məcidli məlumatlandırıb.

E.Məcidli deyib ki, videonun 90 faizi artıq yüklənsə də, tam yüklənmə gecə saatlarında yekunlaşacaq. E.Məcidli videonun ümumi tərkibi ilə bağlı məlumat verərək, onun bütün hissələriylə yayımlanacağını vurğulayıb.

Görüntülərin 09.Xl.2004-cü il tarixində qeydə alındığını deyən E. Məcidli videonun əsas qəhrəmanının DİN polkovniki Rasim İldrımzadə olduğunu bildirib.

Onun bildirdiyinə görə, R. İldırımzadə E. Abdullayevin qardaşı Mahir Abdullayevin geri qaytarılması ücün ondan 1 milyon ABŞ dolları tələb edib. Həmçinin Elşad Abdullayevlə BDU-nun huquq fakültəsində birgə oxuduqları dövrü və müəllimləri xatırlayıb, “Mahiri məndən başqa hec kim gətirə bilməz, Siz mənə qarant durmalısınız “deyib.

R. İldrımzadə M. Abdullayevin saxlandığı yeri bildiyini, onu 3-5 günə şəxsən gətirib təhvil verəcəyini, Azərbaycan sərhədində saxlanıldığını, qardaşı ilə telefonla danışmağa qoymadıqlarını deyib.