İntihar edən DİN əməkdaşı Sevinc Babayevanın qudası imiş - YENİLƏNİB

İyunun 17-də Bakının Binəqədi rayonunda DİN-nin Təchizat idarəsinin anbar müdiri olduğu bildirilən Asəf Qasımov adlı şəxsin intihar etməsi ilə bağlı məlumata nazirlikdən reaksiya gəlib. Nazirliyin mətbuat xidmətindən AzNews.az-a bildirilib ki, Təchizat idarəsinin Asif Qasımov adlı əməkdaşı olmayıb. İntihar edən şəxsin DİN-in başqa strukturunda işləməsi ehtimalına gəlincə isə, nazirlikdən bu barədə məlumatın ancaq müvafiq araşdırmalardan sonra söyləməyin mümkünlüyü vurğulanıb.

AzNews.az-ın əməkdaşı iştirakçı qismində mərhumun Binəqədi rayonu, Binəqədi qəsəbəsi, 1-ci mədən, 30-cu korpus, ev 39 ünvanında təşkil olunan yas mərasimində iştirak edib. Və Asif Qasımovla bağlı olduqca ilginc məlumatlar əldə edib. Məlum olub ki, Asif Qasımovun müdiri olduğu anbarda bir müddət əvvəl Vergilər Nazirliyinin əməkdaşları tərəfindən ciddi yoxlamalar aparılıb.

Yoxlama nəticəsində külli miqdarda vergidən yayınma faktı müəyyən edilib. Bu isə A. Qasımovu olduqca çətin vəziyyətə salıb. İntihar hadisəsinin də bu məsələ ilə əlaqəli olduğu istisna edilmir. Çünki vergidən yayındırılan vəsaitin həddindən artıq böyük olduğu və A. Qasımovun həmin vəsaiti ödənməsi ilə bağlı çətinliklərinin olduğu söylənilir. Adının çəkilməsini istəməyən mərhumun yazınlarından əməkdaşımıza bildiriblər ki, o, son günlərdə həbs olunacağını söyləyirmiş. Müxbir hadisə baş verən ünvanda başqa bir maraqlı və diqqətçəkən məqamla da qarşılaşıb. Belə ki, o, mərasimdə Elşad Abdullayevlə sabiq millət vəkili Gülər Əhmədovanın videoqalmaqalında hallandırılan mərhum Sevinc Babayevanın oğlu ilə qarşılaşıb.

A. Qasımovun yaxınları ilə söhbətdən məlum olub ki, Sevinc Babayevanın oğlu Ayxan Məmmədov mərhumun qızı ilə evlidir. Beləliklə, intihar edən DİN rəsmisi Sevinc Babayevanın qudası olub.

*****

12:53

Binəqədi rayon Prokurorluğundan Lent.az-a verilən məlumata görə, intihar etmiş şəxs Binəqədi qəsəbəsi, 1-ci mədən, 30-cu korpus ev 39 ünvanında yaşayan Qasımov Asif Xanlar oğludur. O, yaşadığımənzildə özünü asaraq intihar edib. Faktla bağlı cinayət işi başlanılıb. İntiharın səbəbləri hələlik məlum deyil.

A.Qasımovun iş yeri və sair barədə ətraflı məlumat verilmir.

****

12:53

Binəqədi rayonu ərazisində intihar hadisəsi baş verib. Lent.az-ın aznews.az-a itinadən verdiyi məlumata görə, intihar edən şəxs Daxili İşlər Nazirliyinin əməkdaşı Asif Qasımovdur. Rayon polis idarəsinin 4-cü bölməsindən intihar hadisəsinin baş verdiyi təsdiqlənsə də, təfərrüatlar barədə hələlik məlumat verilməyib.

Binəqədi rayon prokurorluğundan isə bildirilib ki, A.Qasımov özünü evin hamamından asaraq intihar edib. Mərhumun intihar etməsinin səbəbləri isə hələlik məlum deyil. Hazırda hadisə ilə bağlı rayon prokurorluğunda araşdırma aparılır.

AzNews.az-ın əldə etdiyi başqa bir məlumata görə isə A.Qasımov DİN-nin Təchizat İdarəsinin anbarlarının birinin müdiri olub. Ancaq DİN-in mətbuat xidmətindən bu barədə onlarda heç bir məlumatın olmadığı vurğulanıb.

Mövzunu diqqətdə saxlayacağıq.