Bakıdakı çay evindəki qətllə bağlı məhkəmə davam edir

Bakıda müştərisi olduğu çay evinin sahibini güllələməkdə təqsirli bilinən Vüqar Şirinov cinayət işi üzrə məhkəmə başlayıb.

Lent.az-ın məlumata görə, Bakı Ağır Cinayətlər Məhkəməsində hakim Mayıl Bayramovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Vüqar Şirinov qısa çıxış edib. O bildirib ki, mən cinayətkar deyiləm, hər şey birdən birə oldu: "Xahiş edirəm ki, mənim yaşadığım həyat tərzini araşdırır. Hər zaman ziyalı adamlarla oturmuşam. İmkanım həmişə olub. Baxın da mən necə yaşamışam, zərərçəkən tərəf necə yaşayıb. Himayəmdə bir az yaşlı uşaq olsa da yüzə yaxın adamı dolandırmışam. Araşdırsanız bunu da öyrənə bilərsiz. Hamıya əl tutmuşam". Məhkəmə baxışı oktyabrın 6-da təyin edilib.

Qeyd edək ki, qətl hadisəsi keçən il martın 6-da axşam saatlarında Nəsimi rayonun 4-cü mikrorayon ərazisində fəaliyyət göstərən “Odlar Yurdu” adlı çay evində baş verib. Çay evinin sahibi, Ağsu rayon sakini Murad Aqil oğlu Qubadov borc verdiyi şəxs tərəfindən güllələnib. Məlumata görə, çay evinin sahibi M.Qubadov bir müddət əvvəl tanışı, Ağsu rayon sakini Vüqar Şirinova borc pul verib. Bir müddət sonra M.Qubadov V.Şirinova bir neçə dəfə zəng edərək pulunu istəyib. Pulu qaytara bilməyən V.Şirinov isə ondan vaxt istəyib. Lakin həmin müddətdə də o, borcu qaytara bilməyib. Martın 6-da M.Qubadov yenidən V.Şirinova zəng vuraraq borcunu tələb edəndə, tərəflər arasında mübahisə yaranıb. V.Şirinov naməlum şəraitdə əldə etdiyi qundağı kəsilmiş ov tüfəngi ilə “Odlar Yurdu” çay evinə gələrək sahibkarın otağına daxil olub. V.Şirinov otaqda M.Qubadova 3 atəş açaraq onu qətlə yetirib və hadisə yerindən qaçıb. Polis əməkdaşları tərəfindən hadisədə istifadə edilmiş qundağı və lüləsi kəsilmiş “İJ-12” markalı ov tüfəngi ondan götürülüb. V.Şirinov hadisəni törədəndən sonra Ağsu rayonunda valideynlərinin yanına qaçıb. Onlarla sağollaşan V. Şirinov könüllü olaraq Ağsu rayon Polis İdarəsinə təslim olub. O, Nəsimi RPİ 19-cu PB-nin əməkdaşlarına təhvil verilib.