Bakıda məktəbdə baş vermiş güclü yanğın söndürüldü - YENİLƏNİB 3

Fövqəladə Hallar Nazirliyi Səbail rayonunda baş verən yanğınla bağlı növbəti məlumatı yayıb. Lent.az-ın nazirliyin saytına istinadən verdiyi məlumata görə, Bakı şəhəri, Səbail rayonunda hazırda tikintisi başa çatmamış, ümumi sahəsi 3000 kv.m olan idman zalının xarici divarlarına vurulmuş plastik divar üzlüyü 1020 kv.m, 1 otağın yanar konstruksiyaları və içərisində olan idman ləvazimatları 23 kv.m sahədə yanıb.

İdman zalının qalan hissəsi və ona bitişik ümumi sahəsi 7000 kv.m olan tədris binası yanğından mühafizə olunub. Yanğın saat 14:20-də yanğınsöndürənlər tərəfindən söndürülüb.

*****

15:51

Bu gün Bakı şəhərinin Səbail rayonu Bibiheybət qəsəbəsində tikilməkdə olan təhsil kompleksində baş vermiş yanğın söndürülüb. Səbail rayon Polis İdarəsindən Lent.az-a verilən məlumata görə, yanğın saat 14:32-də tamamilə söndrülüb. Daha sonra ərazidə qabaqlayıcı tədbirlərin görülməsinə başlanılıb.

Yanğın nəticəsindəölən və ya xəsarət alan olmayıb.

*****

14:12

Fövqəladə Hallar Nazirliyi bu gün Bakı şəhərinin Səbail rayonunda qeydə alınan güclü yanğınla bağlı məlumat yayıb. Lent.az-ın nazirliyin saytına istinadən verdiyi məlumata görə, Fövqəladə Hallar Nazirliyinin “112” qaynar telefon xəttinə Bakı şəhəri, Səbail rayonunda inzibati binada yanğın hadisəsinin baş verməsi barədə məlumat daxil olub. Dərhal hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin canlı qüvvə və texnikası cəlb olunub və aidiyyəti qurumlar məlumatlandırılıb. Əlavə məlumat veriləcək.

*****

13:52

Hadisə şahidlərinin Lent.az-a verdiyi məlumata görə, Dövlət Neft Şirkətinin Bibiheybət Neft-Qaz Çıxarma İdarəsinin ərazisində, tikilməkdə olan Müasir İstedadlar Məktəbində güclü yanğın başlayıb.

Hadisə yerinə bir neçə yanğınsöndürmə briqadası cəlb edilib. Səbail rayon polis İdarəsindən bildirilib ki, hadisə ilə bağlı 3-cü dərəcəli çağırış verilib.

Yanğının söndürülməsi üçün iş aparılır.

Fotolar qafqazinfo.az saytından götürülüb.