Bakıda güclü partlayış: yaralılar var - YENİLƏNİB

İyunun 11-də Bakı şəhərinin Nizami rayonunda baş vermiş güclü partlayış nəticəsində yaralanan şəxslərin kimliyi müəyyənləşib. Lent.az-ın Daxili İşlər Nazirliyinin mətbuat xidmətinə istinadən verdiyi məlumata görə, saat 14 radələrində paytaxtın Nizami rayonu Ə.Əzimzadə küçəsində Bakı şəhər sakini Həbib Cəfərova məxsus mebel sexində yanğınla müşiyət edilən partlayış baş verib. Nəticədə sexin 15 kvm. sahəsində olan taxta tullantıları yanıb, yanıq xəsarətləri almış sexdə işləyən fəhlələrdən - paytaxt sakinləri Mirzə Zeynalova, Manaf Babayevə, Abşeron rayon sakini Ağa Əzimova xəstəxanada ilkin tibbi yardım göstərilib. Paytaxt sakinləri Tufan Məmmədov və Türkiyə vətəndaşı Cahid Karaca isə xəstəxanaya yerləşdiriliblər.

Faktla bağlı araşdırma aparılır.

*****

11 iyun 17:57

Lent.az-ın Fövqəladə Hallar Nazirliyinin saytına istinadən verdiyi məlumata görə, "Ocaq " ASC-yə məxsus mebel fabrikinin ərazisində yerləşən ümumi tutumu 50 kub.m olan taxta yonqarı bunkerində yanğınla nəticələnən partlayış baş verib.

Yanğın nəticəsində bunkerin içərisində və altına yığılmış taxta yonqarı, taxta məmulatları 25 kv.m sahədə yanıb. Partlayış zamanı şəxsiyyətləri məlum olmayan 4 nəfər fəhlə müxtəlif dərəcəli xəsarətlərlə yanğın bölmələri hadisə yerinə çatana kimi işçilər tərəfindən Yanıq Mərkəzinə və 1 saylı Mərkəzi Klinik xəstəxanasına aparılıb. Mebel fabriki və əraziyə yığılmış taxta məmulatları yanğından mühafizə olunub.

Yanğın saat 14:57-də yanğınsöndürənlər tərəfindən söndürülüb.