Bakıda siqaret dəhşətli hadisəyə səbəb oldu: ər və arvadı öldü - YENİLƏNİB2

Bu gecə Bakıda ər və arvadının ölümünə səbəb olan dəhşətli yanğının səbəbi məlum olub. Lent.az-ın məlumatına görə, gecə saatlarında Yeni Günəşli qəsəbəsi “V” yaşayış sahəsindəki binada yaşayan 1951-ci il təvəllüdlü Abbasov Mikayıl Həsən oğluna məxsus evdə baş verən yanğına siqaret səbəb olub. Belə ki, M.Abbasov yataq xəstəsi olduğundan əlindən düşən siqaret kötüyünü xalçanın üstündən götürməyə nail ola bilməyib. Nəticədə evin döşəməsində yanğın başlayıb və 11 kvadrat mer sahədə yanar konstruksiyalar, yataq dəsti və digər əşyalar yanıb. M.Abbasovun 65 yaşlı həyat yoldaşı Mikayılova Zoya Vladimirovna digər otaqda olduğundan o da olaydan gec xəbər tutub və tüstü bürümüş otaqda həyat yoldaşını xilas etmək istəyərkən boğularaq ölüb.

Faktla bağlı başlanmış cinayət işinin istintaqı davam etdirilir.

*****

11:21

Bakıda iki nəfərin ölümü ilə nəticələnən yanğın hadisəsi ilə bağlı cinayət işi başlanıb.

Bakı şəhər Prokurorluğundan APA-ya verilən məlumata görə, Suraxanı rayonu, Yeni Günəşli qəsəbəsində çoxmənzilli yaşayış binasındakı mənzillərdən birində 1951-ci il təvəllüdlü Mikayıl Abbasov və onun həyat yoldaşı, 1951-ci il təvəllüdlü Zoya Abbasovanın yanmış meyitləri aşkar edilib. Dərhal hadisə yerinə Fövqəladə Hallar Nazirliyinin mütəxəssisləri, Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyinin ekspertləri, polis və prokurorluq əməkdaşlarının iştirakı ilə baxış keçirilib.

Faktla bağlı Suraxanı rayon Prokurorluğundan Cinayət Məcəlləsinin 314.2-ci (ehtiyatsızlıq, zərərçəkmiş şəxsin ölümünə səbəb olduqda) maddəsi ilə cinayət işi başlanıb, müvafiq ekspertizalar təyin edilib, zəruri və təxirəsalınmaz istintaq tədbirləri davam etdirilir.

*****

10:15

Bakıda dəhşətli yanğın olub. Lent.az Fövqəladə Hallar Nazirliyinin saytına istinadən xəbər verir ki, Suraxanı rayonunda çoxmənzilli yaşayış binasında vətəndaşa məxsus ümumi sahəsi 60 kv.m olan 3 otaqlı mənzilin 1 otağında divan 2 kv.m sahədə və yerə döşənmiş xalça yanıb. Yanğının kəşfiyyatı zamanı ev sahibi 1951-ci il təvəlüdlü Abbasov Mikayıl və onun həyat yoldaşı 1951-ci il təvəlüdlü Abbasova Zoyanın yanmış meyitləri aşkar olunub.

Mənzilin qalan hissəsi yanğından mühafizə olunub. Hadisə ilə əlaqədar müvafiq qurumlar tərəfindən təhqiqat aparılır. Yanğın saat 03:12-də yanğınsöndürənlər tərəfindən söndürülüb.