Bakıda əsgər ölümünə etiraz aksiyası başa çatdı

Bu gün Azərbaycan Ordusunun əsgəri Ceyhun Qubadovun müəmmalı ölümü ilə əlaqədar bir qrup gəncin sosial şəbəkələr vasitəsilə Bakının Fəvvarələr meydanına təyin etdiyi aksiya keçirilib.

APA-nın hadisə yerində olan əməkdaşlarının məlumatına görə, aksiyada hərbi xidmət zamanı dünyasını dəyişən bir qrup gəncin valideynləri, siyasi partiyaların, gənclər təşkilatlarının və müxtəlif QHT-lərin nümayəndələri iştirak ediblər. Aksiyanı yerli hüquq müdafiəçiləri, ATƏT-in Bakı ofisinin və bəzi səfirliklərin nümayəndələri izləyiblər.

Aksiyada hərbi xidmət zamanı dünyasını dəyişmiş əsgərlərin şəkilləri, Azərbaycan və Türkiyənin bayraqları qaldırılıb. Aksiyaçılar “Şəhidlər ölməz, Vətən bölünməz!”, “Əsgər ölümünə son!” və digər şüarlar səsləndiriblər.

Aksiya iştirakçıları ilə polis arasında ciddi qarşıdurma baş verməyib və polisin aksiyaya kobud müdaxiləsi qeydə alınmayıb.

Polis səsgücləndirici vasitəsilə aksiya iştirakçılarını dağılışmağa, ictimai asayişi pozmamağa çağırıb.

Aksiyaçılardan ayrılaraq Nizami kinoteatrı istiqamətində siyasi şüarlar səsləndirə-səsləndirə yürüş etmək istəyən bir neçə nəfər polis tərəfindən saxlanılıb.

Aksiya başa çatdıqdan sonra bir qrup gənc Yeni Azərbaycan Partiyasının qarşısında şüarlar səsləndirib, onlardan bir neçəsinin polis tərəfindən saxlanıldığı bildirilir. Saxlanılanlar arasında AXCP Gənclər Təşkilatının sədri Əbülfəz Qurbanlı, Müsavat başqanı İsa Qəmbərin oğlu Turqut Qəmbər, REAL sədri İlqar Məmmədov da var.

Qeyd edək ki, əsgər Ceyhun Qubadovun ailə üzvləri arasından aksiyada iştirak edən olmayıb. Əsgərin anası Samirə Qubadova APA-ya bildirib ki, o, aksiyaya qatılmayıb: “Mən oğlumun yas mərasimini keçirirəm, heç bir aksiyada iştirak etmək fikrim yoxdu. Dünən də bununla bağlı müraciət etmişəm”.