Azərbaycanda vəzifəli şəxsə hökm oxundu

Bakı Ağır Cinayətlər Məhkəməsində “Azəryaşlandşaft” Açıq Səhmdar Cəmiyyətinin Yaşıllıqların qorunması və mühafizəsi şöbəsinin mütəxəssisi olmuş Elçin Musayevin cinayət işi üzrə məhkəmə prosesi başa çatıb.

APA-nın məlumatına görə, hakim Zeynal Ağayevin sədrliyi ilə keçirilən prosesdə hökm oxunub. Hökmə əsasən, E. Musayev 5 il 6 ay azadlıqdan məhrum edilib.

Qeyd edək ki, Elçin Musayev Yasamal rayonunda – Dövlət Sosial Müdafiə Fondunun yaxınlığında yerləşən torpaq sahəsindəki 9 ağacın köçürülməsi adıyla həmin ərazinin sahibi Ramiz Cabbarlıdan 33 min manat pul alıb qaytarmamaqda, dələduzluq etməkdə təqsirləndirilir.

E.Musayev pulu səlahiyyətli məmurlara rüşvət vermək adıyla alıb. Bununla həm də R.Cabbarlını rüşvət verməyə təhrik edib.

İstintaq orqanı E.Musayevə qarşı Cinayət Məcəlləsinin 178 (dələduzluq), 34.312-ci (rüşvət verməyə təhrik) maddələri ilə ittiham irəli sürüb.