Zorlamada ittiham edilən baş redaktordan açıqlama - YENİLƏNİB

“Mətbuat Şurasının “qara siyahı”sında adı olan “Vətəndaş və İnkişaf” qəzetinin baş redaktoru üç gün əvvəl bir nəfərlə mənim yanıma gəldi ki, bu oğlan tələbədir, onu işə götür. Həmin xanıma jurnalda boş ştat olmadığını deyəndə, mənə rüşvət təklif etdi. Mən isə onu bu təklifini qəbul etmədim”.

Bunu APA-ya açıqlamasında seksual hərəkətlərə yol verməkdə ittiham edilən “Müstəqil Lider” jurnalının baş redaktoru Faiq Əhmədov deyib.

F. Əhmədovun sözlərinə görə, adının əxlaqsız hərəkətdə hallanması ona atılan böhtandır: “Rüşvəti qəbul etməyəndə həmin tələbə oğlan bir vəzifəli adamın adını çəkdi və məni hədələyəndə onu otaqdan qovdum. Bu gün “Vətəndaş və İnkişaf” qəzetinin baş redaktoru yanıma bir qız uşağı ilə gəldi. Dedi, qızıdır, uşaq evindən götürüb, mənim yanımda işləsin. Jurnalın əməkdaşı ona mətn korrektə etməyi tapşırsa da, o, işi görməkdən imtina edib. Buna görə də işdən azad olunub. Məhz bundan sonra mənə böhtan atdılar ki, guya həmin azyaşlı qız uşağına əxlaqsız təklif etmişəm”.

F. Əhmədov əlavə edib ki, məsələ ilə bağlı polisdə ifadə verib və bu gün Yasamal Rayon Məhkəməsinə müraciət edib.

***

18.20

Azərbaycanda daha bir baş redaktor zorlanmada ittiham edilir. Yasamal Rayon Polis İdarəsindən APA-ya verilən məlumata görə, hadisə Azərbaycan Nəşriyyatının inzibati binasında qeydə alınıb.

“Müstəqil Lider” jurnalının baş redaktoru Faiq Əhmədov, 2001-ci il təvəllüdlü 7-ci sinif şagirdi A.Ş.-yə qarşı seksual hərəkətlər etməkdə təqsirli bilinir.

Onun “Vətəndaş və İnkişaf” qəzetinin baş redaktoru olan anası hadisə barədə polisə ərizə ilə müraciət edib.

Hazırda faktla bağlı araşdırma aparılır.