Azərbaycan icması Vaşinqtonda etiraz aksiyası keçirib

Martın 13-də Vaşinqtonda Azərbaycan icmasının fəalları erməni təşkilatları və ermənipərəst konqresmenlərin Konqres binalarından birində “Dağlıq Qarabağın azadlığı uğrunda mübarizənin başlanmasının 25 illiyi” tədbirinə qarşı etiraz mitinqi keçirib.

Diasporla İş üzrə Dövlət Komitəsinin mətbuat xidmətindən Lent.az-a verilən məlumata görə, aksiya iştirakçıları ABŞ-da erməni təşkilatlarına və Azərbaycanın ərazisi Dağlıq Qarabağın işğalını leqallaşdırmağa çalışan Ermənistanın ABŞ-dakı səfirliyinə qarşı etirazlarını bildiriblər.

Aksiya iştirakçılar əllərində Azərbaycan, Türkiyə və ABŞ bayraqları, həmçinin üzərində “Ermənistan, Azərbaycan və Gürcüstana qarşı ərazi iddialarından əl çək!”, “Ermənistan Xocalı soyqırımına görə məsuliyyət daşıyır”, “Qarabağ hər zaman Azərbaycanın tarixi və qanuni hissəsi olub!” kimi plakatlar tutublar. Kapitoli Hilddə baş tutan etiraz aksiyasında Azərbaycan, Türkiyə, Özbəkistan diasporunun nümayəndələri fəal iştirak ediblər.

Qeyd edək ki, ermənilərin tədbirində Ermənistanın ABŞ-dakı səfirliyinin, qondarma “DQR-in nümayəndəliyinin” üzvlərinin iştirakı, “DQR gənclər naziri” isə müraciətlə çıxışı nəzərdə tutulub.