Apelyasiya Məhkəməsi saxta manat satan şəxsin cəzasını yüngülləşdirmədi
20 aprel 2015 11:27 (UTC +04:00)

Apelyasiya Məhkəməsi saxta manat satan şəxsin cəzasını yüngülləşdirmədi

 

 

Bakı Apelyasiya Məhkəməsində saxta pul dövriyyəsində ittiham olunan Kürdəmir rayon sakini Kamil Məmmədovun cinayət işi üzrə məhkəmə prosesi başa çatıb.

 

Lent.az-ın məlumatına görə, hakim Həsən Əhmədovun sədrliyi ilə keçirilən prosesdə qərar elan edilib. Hakimlər kollegiyasının qərarı ilə apellyasiya şikayəti təmin olunmayıb.

 

 

Qeyd edək ki, əvvəllər məhkum olunmuş Kamil Məmmədovun saxta manat əldə edərək satmaq istəməsi barədə Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə əməliyyat məlumatı daxil olduqdan sonra dərhal əməliyyat axtarış tədbirlərinə başlanılıb.

Polis əməkdaşları Kamil Məmmədovu paytaxtın Nizami rayonu Qara Qarayev prospektində yerləşən “Ləzzət otağı” kafesində saxlayıblar. Kamil Məmmədov 200 ədəd saxta 100 manatlıq əsginasları 4 min Amerika dollarına satarkən cinayət başındaca tutulub. Onun üstünə baxış zamanı əlavə olaraq 56 ədəd 100 manatlıq, 4 ədəd 50 manatlıq saxta pul əsginasları aşkar edilərək götürülüb. Bundan əlavə Kamil Məmmədov satış nəticəsində əldə etdiyi 4 min həqiqi Amerika dollarını da  əməliyyatçılara təqdim edib.

 

Saxlanılan şəxs ifadəsində bildirib ki, saxta manatları ölkəmizdən kənarda hazırlatdırıb və dövriyyəyə daxil etmək üçün gizli yolla Bakı şəhərinə gətirib. Saxta pul nümunələrinə baxış zamanı əsginasların xüsusi peşəkarlıqla hazırlandığı, həqiqi manatdan bir o qədər seçilmədiyi müəyyən olunub.

 

Bakı Ağır Cinayətlər Məhkəməsinin hökmü ilə Kamil Məmmədov 10 il müddətinə azadlıqdan məhrum edilib. Kamil Məmmədov apelyasiya şikayəti verərək cəzasının yüngülləşdirilməsini istəyib.

# 71
avatar

Səlcuq Elçin

Oxşar yazılar