MTN-nin daha bir idarə rəisi həbs edilib - YENİLƏNİB

Azərbaycan Milli Təhlükəsizlik Nazirliyinin Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov barəsində həbs qətimkan tədbiri seçilib.

APA-nın məlumatına görə, A. Çovdarov Cinayət Məcəlləsinin 308.2, 309.1, 302.2-ci və 311-ci maddələri ilə təqsirləndirilən şəxs qismində cəlb olunaraq, Səbail rayon Məhkəməsi tərəfindən 3 ay müddətinə azadlıqdan məhrum edilib.

Qeyd edək ki, çoxsaylı sahibkarların şikayəti ilə yanaşı MTN-nin Energetika və Nəqliyyat Sahələrində Təhlükəsizlik Baş İdarəsinin həbs edilmiş sabiq əməkdaşları da A. Çovdarovun əleyhinə ifadə veriblər.

Xatırladaq ki, bundan əvvəl MTN-in Energetika və Nəqliyyat Sahələrində Təhlükəsizlik Baş İdarəsinin idarə rəisi Akif Əliyev, şöbə rəisi Orxan Osmanov, həmçinin Transmilli Mütəşəkkil Cinayətkarlığa Qarşı Mübarizə Baş İdarəsinin əməkdaşları Natiq Alıyev və Zaur Məmmədov barəsində də həbs qətimkan tədbiri seçilib.

Çovdarov da Bakı İstintaq Təcridxanasına aparılıb.

Qeyd edək ki, A. Çovdarovun həbs olunması barədə ilk xəbəri haqqın.az saytı yayıb.

***

16:51

MTN-in Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov barədə 3 ay müddətinə həbs-qətimkan tədbiri seçilib.

Haqqin.az saytının məlumatına görə, A. Çovdarovla bağlı qərarı Səbail Rayon Məhkəməsi verib.