"Günəşli"dəki qəza ilə əlaqədar toplantı: helikopterlər və gəmilər hərəkətə keçdi

Dekabrın 10-da “Günəşli” yatağındakı 10 saylı dərin dəniz özülündə baş vermiş qəza ilə əlaqədar olaraq yaradılmış işçi qrupunun növbəti iclası keçirilib. Lent.az-ın məlumatına görə, iclasda Azərbaycan Respublikası Fövqəladə Hallar Nazirinin müavini Tapdıq Əmiraslanov, Ekologiya və Təbii Sərvətlər Nazirliyinin məsul əməkdaşları, SOCAR-ın vitse-prezidentləri Rəfiqə Hüseynzadə, Rəhman Qurbanov, habelə BP şirkətinin vitse-prezidenti Robert Vat və aidiyyatı üzrə mütəxəssislər iştirak edib.

Tədbirdə mümkün ekoloji problemlərin və neft dağılmaları ehtimalının hesablanması və qarşısının alınması məsələləri müzakirə olunub. Bu məqsədlə havadan helikopter və sudan gəmilər vasitəsi ilə ərazi koordinatlarının müəyyən edilməsi və zəruri tədbirlər görülməsi üçün “Azərkosmos”dan ərazinin gündəlik çəkilişlərinin alınmasına qərar verilib. Ərazini mümkün neft dağılmalarından qorumaq məqsədi ilə su səthinə xüsusi gəmilər vasitəsi ilə dağılmalara qarşı bonların düzülməsi nəzərdə tutulub.

Keçirilmiş iclasın nəticəsi olaraq bu gün səhər işçi qrupun üzvləri qəza yerinə uçaraq, helikopterdən əraziyə baxış keçirilib. Uçuş zamanı qəza ərazisində neft dağılmaları müşahidə edilməyib. Qəza rayonunda mütəmadi müşahidə və tədqiqatlar aparılması üçün 1 ədəd monitorinq gəmisi və neft dağılmalarına qarşı müasir avadanlıqlarla təchiz edilmiş 6 digər gəmi əraziyə göndərilib. Xüsusi təchiz edilmiş bu gəmilər dağılma halları baş verərsə, neftin yığılması və utilizasiya məntəqələrinə çatdırılması üçün tam hazır vəziyyətə gətirilib.