Qayınanasını öldürüb, arvadını yaralayana AĞIR CƏZA

Qayınanasını öldürüb, arvadını yaralamaqda təqsirləndirilən Cəsarət İsgəndərovun cinayət işi üzrə məhkəmə prosesi başa çatıb.

Lent.az-ın məlumatına görə, Bakı Ağır Cinayətlər Məhkəməsində , hakim Əhməd Quliyevin sədrliyi ilə keçirilən prosesdə hökm oxunub.

Hakimlər kollegiyasının hökmünə əsasən o, 20 il müddətinə azadlıqdan məhrum edilib.

Qeyd edək ki, hadisə Bakının Nərimanov rayonunda baş verib. C.İsgəndərov rayonun Əliyar Əliyev küçəsi, 24 ünvanında yaşayan 51 yaşlı Fəhminə İsgəndərova və onun qızı Leyla İsgəndərovanı bıçaqlayıb. Onun qayınanası hadisə yerində ölüb. L.İsgəndərova isə 5 saylı Kliniki Tibbi Mərkəzə yerləşdirilib. Həkimlərin verdiyi məlumata görə, yaralı 1-ci dərəcəli koma vəziyyətində olub. Daha sonra onun həyatını xilas etmək mümkün olub.

Məlumata görə, 51 yaşlı Fəhminə İsgəndərova qızı Leyla İsgəndərovanı həyat yoldaşı ilə mübahisə etdiyi üçün ata evinə çağırıb.

Bu hadisədən hiddətlənən Cəsarət İsgəndərov ora gəlib. Qapı və pəncərələr ev sahibəsi tərəfindən bağlı olduğundan, Cəsarət İsgəndərov içəri evin damından daxil olub. Bu zaman o, əlindəki bıçaqla əvvəlcə həyat yoldaşına bir neçə zərbə vurub. Bununla sakitləşməyən kişi onları ayırmağa gələn qayınanası Fəhminə İsgəndərovanın ürək nahiyəsinə iki bıçaq zərbəsi endirib.

Xatırladaq ki, cütlüyün birgə nikahından 3 aylıq qız övladı var.