Stansiyada vaqonların təkərlərini oğurladılar - VİDEO

Ələt dəmiryolu stansiyasında vaqonların metal hissələri və təkərləri oğurlanıb.

Daxili İşlər Nazirliyindən Lent.az-a verilən xəbərə görə, Dəmiryolu Nəqliyyatında Polis İdarəsi və Biləcəri Xətt Polis Şöbəsinin əməkdaşları tərəfindən keçirilən əməliyyat nəticəsində adı çəkilən stansiyada park edilən vaqonların metal hissələrini və təkərlərini oğurlayanlar saxlanılıblar.

Əməliyyat zamanı Miraslan Səmədov və Qadir Zəkarayev saxlanılaraq istintaqa təqdim ediliblər. Onların idarə etdikləri yük avtomobilinə baxış zamanı vaqonlardan oğurladıqları metal parçalar, həmçinin hadisə zamanı istifadə etdikləri avadanlıqlar aşkar edilib. Saxlanılan şəxslər ifadələrində bundan əvvəl də iki dəfə Ələt dəmir yolu stansiyasında vaqonların metal hissələrini kəsərək oğurladıqlarını bildiriblər.

Faktla bağlı Dəmiryolu Nəqliyyatında Polis İdarəsinin Biləcəri Xətt Polis Şöbəsində araşdırmalar davam etdirilir.