Qax meşələrində bir nəfər YOXA ÇIXDI - FOTO - YENİLƏNİB

Xəbərə Qax meşələrində itən şəxsin fotosu əlavə edilib.

***

saat 13:45

Qaxda yüksək və çətin relyefli dağlıq-meşəlik ərazidə itkin düşən şəxsin kimliyi məlum olub.

Lent.az-ın məlumatına görə, itkin düşən şəxs Qax rayonu İlisu kənd sakini, 1993-cü il təvəllüdlü Rəhman Sədrəddin oğlu Kamallıdır. Əldə edilən məlumata əsasən, Rəhman Kamallı iyulun 23-ü rayonun Sarıbaş kənd sakini Ramazan adlı çoban tərəfindən Sarıbaş kəndi yaxınlığındakı “Alagöz” yaylağına fermada işləmək üçün aparılıb. Rəhman Kamallının elə "Alagöz" yaylağı yaxınlığında itkin düşdüyü ehtimal edilir.

Daxili İşlər Nazirliyinin Mətbuat Xidmətinin Şəki regional qrupundan Lent.az-a verilən məlumata görə, Qax rayonunun İlisu kənd sakini, 1992-ci il təvəllüdlü Kamallı Rəhman Sədrəddin oğlunun iyulun 23-də təxminən saat 20 radələrində dağlıq-meşəlik ərazidə naməlum istiqamətdə gedərək itkin düşməsi barədə yaxınları tərəfindən polisə müraciət edilib.

Rayon polis şöbəsinin və digər aidiyyəti qurumların əməkdaşları axtarışlara cəlb olunub.

Onun tapılması istiqamətində tədbirlər keçirilir.

***

saat 15:00

Fövqəladə Hallar Nazirliyinin (FHN) "112" qaynar telefon xəttinə Qax rayonunun Ağçay kəndi yaxınlığında dağlıq-meşəlik ərazidə naməlum şəraitdə 1 nəfərin itkin düşməsi barədə məlumat daxil olub.

FHN-dən Lent.az-a- verilən xəbərə görə, məlumatla əlaqədar FHN-nin Şimal-qərb Regional Mərkəzinin xilasetmə qüvvələri axtarış-xilasetmə işlərinin aparılması üçün əraziyə cəlb olunub, aidiyyəti dövlət qurumları məlumatlandırılıb.

Hazırda axtarış-xilasetmə işləri həyata keçirilir.

Əlavə məlumat veriləcək.