Məhəmmədidə yaşayış binasındakı YANĞIN SÖNDÜRÜLDÜ - VİDEO - YENİLƏNİB

Abşeron rayonu, Məhəmmədi kəndində yerləşən yaşayış binasında baş vermiş yanğın Fövqəladə Hallar Nazirliyi tərəfindən tam söndürülüb.

Bu barədə Lent.az-a FHN-dən məlumat verilib.

***

13:00

Dövlət Yanğından Mühafizə Xidmətinin rəis müavini Əkbər Novruzovun mətbuata açıqlaması:

“Fövqəladə Hallar Nazirliyinin "112" və “101” qaynar telefon xətlərinə Abşeron rayonu, Məhəmmədi kəndində çoxmərtəbəli yaşayış binasında yanğın baş verməsi barədə məlumat daxil olub. Dərhal əraziyə FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub. FHN əməkdaşları məlumat daxil olan andan dörd dəqiqə ərzində hadisə yerinə çatıb. Yanğının mürəkkəbliyi nəzər alınaraq ikinci mürəkkəb yanğın hadisəsi kimi çağırış elan olunub və dərhal Bakı qarnizonunun, habelə FHN-nin digər qurumları da hadisə yerinə cəlb olunub. Yanğının söndürülməsinə görə FHN-nin 25 ədəd texnikaları gətirilib. Həmçinin 132 nəfər şəxsi heyət cəlb olunub. Yanğın hazırda tam lokallaşdırılıb. Yəni məlumat baş verəndən 90 dəqiqə ərzində yanğının miqyası məhdudlaşdırılıb. Yanğın binanın çardaq hissəsində baş verib. Daha sonra kabellər vasitəsilə şaxtaya keçərək birinci mərtəbədə yerləşən ticarət obyektinə keçib. Yanan çardaq hissə təxminən, 600 kvadrat metrdir. Hazırda da birinci mərtəbədə yerləşən ticarət obyektindəki yanğının söndürülməsi prosesi davam edir. Əhali tam təxliyə olunub. Vətəndaşlar arasında xəsarət alan yoxdur. Yeddinci mərtəbədə mənzillərə ziyan dəyib. Yanğının səbəbləri aidiyyatı qurumlar tərfindən araşdırılır. Yəni yanğının hansı şəraitdə, hansı istiqamətdə baş verməsi barədə məlumat yoxdur”.

***

Fövqəladə Hallar Nazirliyi tərəfindən həyata keçirilmiş təcili və təxirəsalınmaz tədbirlər sayəsində Abşeron rayonu, Məhəmmədi kəndində yerləşən yeddimərtəbəli yaşayış binasındakı yanğın qısa müddətdə məhdudlaşdırılıb.

FHN-dən Lent.az-a verilən məlumata görə, hazırda yanğının tam söndürülməsi istiqamətində tədbirlər davam etdirilir.

Yanğınla mübarizə tədbirlərinə Fövqəladə Hallar Nazirliyinin ümumilikdə 25-ə yaxın texnika və 130 nəfərə yaxın canlı qüvvəsi cəlb olunub.

Əlavə məlumat veriləcək.

***
Saat: 11:45

Məhəmmədidə yaşayış binasında yanğın davam edir.

Lent.az-ın hadisə yerində olan əməkdaşının verdiyi xəbərə görə, xilasedicilər hazırda bina sakinlərini təxliyə edir.

***

saat 11:05

Fövqəladə Hallar Nazirliyi Məhəmmədidə baş verən yanğınla bağlı məlumat yayıb.

FHN-dən Lent.az-a verilən məlumata görə, nazirliyin "112" qaynar telefon xəttinə Abşeron rayonu, Məhəmmədi kəndində altımərtəbəli yaşayış binasının dam örtüyündə yanğın olması barədə ilkin məlumat daxil olub.

Məlumatla əlaqədar FHN-nin Dövlət Yanğından Mühafizə Xidmətinin və Xüsusi Riskli Xilasetmə Xidmətinin müvafiq qüvvələri çağırış üzrə cəlb olunub.

***

saat 10:53

Bakıda hündürmərtəbəli yaşayış binasında yanğın başlayıb.

Lent.az-ın məlumatına görə, hadisə Kürdəxanı-Məhəmmədi yolunda yerləşən yaşayış binasında qeydə alınıb.

Yanğının söndürülməsinə FHN-in yanğınsöndürənləri cəlb edilib.

Əlavə məlumat veriləcək.