Bir gecədə iki yanğın baş verdi, 4 nəfər... - YENİLƏNİB

Şəkinin Baş Zəyzid kəndində baş verən yanğında 4 nəfər xəsarət alıb.

Lent.az-ın məlumatına görə, yanğın zamanı evdə olan 1986-cı il təvəllüdlü Pərviz Əkrəm oğlu Əliyev və 1966-cı il təvəllüdlü Kəmalə İlməddin qızı Əliyeva müxtəlif dərəcəli yanıq xəsarətləri alıblar. Daha iki nəfər 1964-cü il təvəllüdlü Mahizər Ağaməmməd qızı Balaməmmədova və 1971-cü il təvəllüdlü Qurban Ağaməmməz oğlu Mehdiyev qorxudan isterik vəziyyətə düşüblər. Xəsarət alanların dördü də Şəki Rayon Mərkəzi Xəstəxanasına yerləşdiriliblər.

***

Saat 07:20

Şəkidə bir gecədə iki yanğın hadisəsi baş verib.

Lent.az xəbər verir ki, yanğınlardan biri gecə saat 03:26-da rayonun Baş Zəyzid kəndində, kənd sakini İlqar Balaməmədova məxsus ümumi sahəsi 242 kvadratmetr olan kürsülü birmərtəbəli 5 otaqdan ibarət fərdi yaşayış evində baş verib. Yanğın genişlənərək evə bitişik tikilən ümumi sahəsi 44 kavadratmetr olan köməkçi tikiliyə və yaxınlıqda olan ümumi sahəsi 88 kvadratmetr olan mal tövləsinə də keçib.

Yanğının söndürülməsi üçün əraziyə Fövqaladə Hallar Nazirliyinin (FHN) Şəki Rayon Dövlət Yanğından Mühafizə Hissəsinin yanğınsöndürən maşınları və şəxsi heyəti cəlb edilib. Yanğın nəticəsində evin yanar konstruksiyaları içərisindəki ev əşyaları ilə birlikdə, köməkçi tikilinin yanar konstruksiyaları və tikilinin altında olan “VAZ - 2106” markalı minik avtomobilinin yanar konstruksiyaları, mal tövləsinin yanar konstuksiyaları və tövlənin damına yığılmış 4 ton quru ot kütləsi yanıb.

Yanğın zamanı mal tövləsində olan 6 baş iribuynuzlu heyvan tüstüdən boğularaq təlaf olub.

Ev sahibinin dediyinə görə, ona məxsus əmlaklar qəsdən yandırılıb.

Digər yanğın isə gecə saat 02:55-də rayonun Vərəzət kəndində, kənd sakini Əkrəm Əliyevin yaşadığı evin həyətyanı sahəsindəki ümumi sahəsi 90 kvadratmetr olan mal tövləsində baş verib. Yanğın nəticəsində tövlənin yanar konstruksiyaları və damına yığılmış 5 ton quru ot kütləsi yanıb. Yanğın zamanı 2 baş iribuynuzlu heyvan tüstüdən boğularaq təlaf olub.

Hər iki faktla bağlı müvafiq qrumlar tərəfindən araşdırma aparılır.

Vüqar Heydərov