Bakıda ginekoloq iş yerində qarət olundu - 7 minlik OĞURLUQ

Bakıda klinikada oğurluq hadisəsi olub.

Lent.az xəbər verir ki, hadisə Səbail rayonu ərazisində yerləşən klinikalardan birində qeydə alınıb.

İttiham aktına görə, 58 yaşlı Nurlan Əmiraslanov (ad və soyad şərtidir) həkim-ginekoloq işləyən zərərçəkənin iş otağına girərək, ona məxsus çantadan içərisində 5440 manat və 200 dollar (340 manat) pul olan, özünün dəyəri isə 1400 manat olan cüzdanı oğurlayıb.

Zərərçəkənin şikayəti əsasında Nurlan saxlanılıb və barəsində cinayət işi açılıb.

Təqsirləndirilən şəxs ifadəsində bildirib ki, əvvəllər də dəfələrlə məhkumluq həyatı yaşayıb. Sonuncu dəfə də oğurluğa görə həbs olunub və amnistiya qərarı ilə həbsdən buraxılıb. Onun sözlərinə görə, gözləri zəif olduğu üçün klinikaya gedib. Müəssisənin birinci mərtəbəsində gözləyərkən bir otağın qapısının açıq olduğunu görüb. İçəri daxil olaraq, masanın üzərindəki qara çantadan pul qabını götürüb. Taksi ilə “Koroğlu” metrostansiyasına gəlib. Buradan da avtobusla yeznəsinin kirayədə yaşadığı Zabrat qəsəbəsinə yollanıb. Nurlan bildirib ki, evdə yatarkən polis əməkdaşları mənzilə daxil olaraq, onu saxlayıblar.

Nurlan Əmiraslanov əməlindən peşman olduğunu bildirib.

Məhkəmənin qərarı ilə Nurlan Əmiraslanov 2 il 5 ay 28 gün müddətinə azadlıqdan məhrum edilib.