Azərbaycanlı dənizçinin öldürülməsi ilə bağlı cinayət işi açıldı

Kütləvi informasiya vasitələrində yayılan məlumata əsasən, 2021-ci il yanvarın 23-də Nigeriya sahillərində üzən Türkiyənin “Boden denizcilik” şirkətinə məxsus "Mozart" adlı gəmiyə dəniz quldurları hücum edib.

Baş Prokurorluqdan Lent.az-a verilən məlumata görə, ilkin araşdırma nəticəsində müəyyən edilib ki, 19 nəfər gəmi heyəti üzvündən 15-i girov götürülüb, 1 nəfər isə öldürülüb. Öldürülən şəxsin Azərbaycan vətəndaşı, gəmidə 2-ci mühəndis vəzifəsində çalışan 45 yaşlı Fərman Əli oğlu İsmayılovun olduğu müəyyən edilib.

Faktla bağlı Baş Prokurorluqda Cinayət Məcəlləsinin müvafiq maddələri ilə cinayət işi başlanılaraq zəruri istintaq əməliyyat tədbirləri həyata keçirilir. Hazırda Azərbaycanın Xarici İşlər Nazirliyi, habelə xarici ölkələrin aidiyyəti qurumları ilə intensiv danışıqlar aparılmaqla, qeyd olunan cinayət işi üzrə Türkiyə, Qabon və Liberiyanın səlahiyyətli orqanlarına hüquqi yardım haqqında sorğular hazırlanır.

Baş Prokurorluq təxirəsalınmadan Liberiyanın Baş Prokurorluğu ilə əlaqə yaradıb və qarşı tərəf bu məsələnin araşdırılmasında Azərbaycanın Baş Prokurorluğu ilə yaxından əməkdaşlıq etməyə hazır olduğunu bildirib.