Azərbaycanda yaşlı kişi gənc qızı bıçaqladı - SƏBƏB

Yanvarın 4-də saat 13 radələrində Şirvan şəhər sakini 27 yaşlı Məmmədli Ayşən Hafiz qızına yaşadığı evdə bıçaqla xəsarət yetirilməsi barədə şəhər prokurorluğuna məlumat daxil olub.

Şirvan şəhər Prokurorluğundan Lent.az-a verilən məlumata görə, prokurorluq əməkdaşları hadisə yerinə baxış keçirərək, digər zəruri prosessual hərəkətlər yerinə yetiriblər. Araşdırmalarla zərərçəkmişin tanışı 63 yaşlı Nağıyev Mirhüseyn Balağa oğlunun şəxsi münasibətlər zəminində aralarında yaranmış mübahisə zamanı bıçaqla xəsarət yetirməklə Ayşən Məmmədlini qəsdən öldürməyə cəhd etməsinə əsaslı şübhələr müəyyən edilib.

Faktla bağlı Şirvan şəhər Prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanaraq, müvafiq ekspertizalar təyin edilib.

Mirhüseyn Nağıyev şübhəli şəxs qismində tutularaq istintaqa cəlb olunub. Zəruri istintaq tədbirləri davam etdirilir.