300 milyon dollarlıq kokain aşkarlandı

Yeni Zelandiya yaxınlığındakı Sakit okeanda dəyəri təxminən 316 milyon dollar olan kokain aşkar edilib.

Lent.az xarici mediaya istinadla bildirir ki, bu barədə Yeni Zelandiya polisi məlumat verib.

Komissar Endryu Koster bunun ölkədə indiyə qədər aşkar edilmiş ən böyük narkotik daşımalarından biri olduğunu söylədi.

Qeyd olunur ki, ümumi çəkisi 3,2 ton olan 80-dən çox bağlama kokain şamandıralarla asılıb və okeana atılıb. Bəzi paketlərdə Betmenin simvolları və qara dördyarpaqlı yonca olan stikerlər olub.

Hüquq-mühafizə orqanlarının məlumatına görə, Cənubi Amerikadan göndərilən yük, ehtimal ki, Avstraliya bazarı üçün nəzərdə tutulub.

Tapılan narkotikləri sahilə çatdırmaq üçün Yeni Zelandiya Hərbi Dəniz Qüvvələrinə məxsus gəmidən istifadə edilib. Yük məhv edilmək üçün Oklendə aparılıb.