Bakının mərkəzində nəhəng tıxaclar

Bu gün saat 06.00-dan etibarən Bakının mərkəzində böyük tıxac yaranıb. Lent.az-ın məlumatına görə, buna səbəb iyunun 26-da “Azadlıq” meydanında Azərbaycan Ordusunun yaradılmasının 93-cü ildönümü münasibəti ilə keçiriləcək hərbi paradla bağlı meydanın ətraf yollarının bağlanmasıdır. Sürücülər Bağırov körpüsü, Nobel prospekti, Heydər Əliyev prospekti, 28 May keçəsi, “Neftçilər” prospektləri istiqamətlərində bir saata yaxındır, tıxacda qalıblar.

Qeyd edək ki, yolların bağlanacağı ilə əlaqədar Bakı şəhər Yol Polisi İdarəsi 2 gün əvvəldən məlumat yayıb. Sürücülərə ünvanlanan müraciətdə bildirilir ki, iyunun 23-də saat 06.00-dan başlayaraq, 3 gün ərzində “Azadlıq” meydanı və ona bitişik ərazilərdə, Nobel prospekti, Afiyəddin Cəlilov küçəsi, Üzeyir Hacıbəyov küçəsi, Zərifə Əliyeva küçəsində hərəkət tam məhdudlaşdırılacaq. Həmçinin, Xəqani küçəsi, Keykab Səfərəliyeva küçəsindən Rəsul Rza küçəsinədək, R.Rza küçəsindən Neftçilər prospektinədək, “Azneft” meydanından Q.Abbasov küçəsinədək, “Azadlıq” meydanı və “Sahil” meterosu istiqamətində bütün yollar bağlanacaq.

Nizam RZA