Uşaqları Müdafiə Günündə uşaq faciəsi: 1 ölü, 2 yaralı

İyunun 1-də - Uşaqları Müdafiə Günündə Bakıda 3 azyaşlını maşın vurub. Bu barədə Lent.az-a Bakı şəhər Dövlət Yol Polisi İdarəsindən məlumat verilib.

Məlumata görə, saat 20.00 radələrində Səbail rayonu ərazisində, “Neftçilər” prospektinin “Azadlıq” meydanı ərazisindən keçən hissəsində 90 CP 787 nömrə nişanlı “Tayoto Carolla” valideynləri ilə birgə Dənizkənarı Milli Parka tələsən körpələri vurub. Nəticədə 2002-ci il təvəllüdlü Abbaszadə Fəxrəddin Əfqan oğlu və 2007-ci il təvəllüdlü Ələsgərli Ayan Asif qızı yaralanıblar. Hər iki yaralı ağır vəziyyətdə xəstəxanaya aparılıb. Həmin vaxt uşaqların yanında valideynləri olsa da, onlar körpələri baş vermiş hadisədən yayındıra bilməyiblər.

Daha bir dəhşətli hadisə isə Xətai rayonu ərazisində baş verib. Saat 18:35-də, Gəncə prospekti 105 ünvanının qarşısında 90 DH 680 nömrəli “KİA Sportage” 11 yaşlı Məmmədov Babək Vüqar oğlunu vurub. B.Məmmədov aldığı xəsarətlərdən hadisə yerindəcə dünyasını dəyişib.

Hər iki faktla əlaqədar araşdırma aparılır.

Nizam RZA