Anası ilə mübahisə etdi, özünü asdı

Mayın 25-də Ucar rayonunda intihar hadisəsi baş verib. Rayon Prokurorluğundan Lent.az-a verilən məlumata görə, Alpout kənd sakini, 1988-ci il təvəllüdlü Əliyev Əlisaf Ələmdar oğlu özünü yaşadığı evin həyətindəki mal tövləsində asıb. Lakin həmin vaxt qonşuları onun özünü öldürmək istədiyini görüb və cəld kəndiri kəsib. Xoşbəxtlikdən Ə.Əliyevin həyatını xilas etmək mümkün olub.

Lent.az-a verilən digər məlumata görə, Ə.Əliyev keçən il ailə qurub və bir uşaq atasıdır. Evlənəndən sonra valideynləri ilə birgə yaşayan 23 yaşlı oğlanın tez-tez anası ilə mübahisə edirmiş. Sonuncu dəfə isə onlar arasında mübahisə daha da ciddiləşib. Bundan sonra gənc ailə başçısı intihar etmək qərarına gəlib.

Faktla bağlı Ucar rayon Prokurorluğunda araşdırma aparılır.

Nizam RZA