“Meşə qardaşları”nın fəalının məhkəməsi davam edir

Lent.az-ın məlumatına görə, iclasda zərərçəkmiş Daşqın İbrahimovun ifadəsi dinlənilib. Daha sonra isə hal şahidləri və digər şahidlər ifadə veriblər. Şahidlər partlayış baş verən zaman səcdədə olduqlarını və qumbaranı atan şəxsi görmədiklərini deyiblər.

Növbəti iclas iyunun 1-nə təyin edilib.

Qeyd edək ki, S.Mehdiyev “Meşə qardaşları” silahlı birləşməsinin fəallarından olub. 2008-ci il avqust ayının 17-də Bakıda «Əbu-Bəkr» adı ilə tanınan «Cümə məscidi»də əl qumbarasının partlaması nəticəsində iki nəfər ölüb, 18 nəfər yaralanıb.

MTN-in əməliyyat; nəticəsində müəyyən edilib ki, cinayətdə şübhəli bilinən şəxslər, Zaqatala sakini, Şimali Qafqazdakı qanunsuz silahlı birləşmələrin tərkibində iştirak edən, özünü «Dağıstan camaatı»nın əmiri elan etmiş «Əbdülməcid» ləqəbli İlqar Mollaçiyev, onun qaynı «Suleyman» ləqəbli Samir Mehdiyev və onlarla cinayət əlaqəsində olan radikal dini təmayüllü digərləridir.

«Meşə qardaşları» zərərsizləşdirilib və 17 nəfər üzvünün, o cümlədən liderlərindən biri - «Əbu Cəfər» ləqəbli Naif Əbdul Kərim Əl-Bedevinin həbs edilməsindən sonra həmin silahlı birləşmənin digər başçısı «Əbdülməcid» ləqəbli İlqar Mollaçiyev, onun qaynı Samir Mehdiyev və qeyriləri barəsində cinayət təqibi davam etdirilib. Məlum olub ki, cinayətin törədilməsindən sonra İlqar Mollaçiyev, Samir Mehdiyev, «doktor Muhamməd» ləqəbli ərəb mənşəli şəxs və dah bir neçə cinayətkar Azərbaycanı tərk edib, Samir Mehdiyev və Elnur Bəşirov isə qrupdan ayrılaraq Sumqayıtda qalıb.

Burada Samir Mehdiyev, «Sumqayıt camaatı» adlı silahlı birləşmənin üzvləri vasitəsilə onların rəhbəri, həmin vaxt Gürcüstan ərazisində olan Azər Misirxanovla əlaqə yaradıb və bir müddət Sumqayıt şəhərində gizlənib. Bir müddət sonra Samir Mehdiyev Azər Misirxanovun göstərişinə əsasən, qeyri-qanuni yolla Gürcüstana, ən sonda Pakistana gedib. MTN əməliyyatı nəticəsində Samir Mehdiyev Pakistanda saxlanılıb.

Nizam RZA