İnkassator maşını “Nissan”la toqquşdu: 2 ölü, 3 yaralı

Qəza rayonun Ləcət kəndi ərazisində qeydə alınıb. Lent.az-ın bölgə müxbirinin verdiyi məlumata görə, “Nissan” markalı 90 HZ 804 dövlət nömrə nişanlı avtomaşınla Xaçmaz rayon Regional Poçt idarəsinin inkassator maşını toqquşub.
Hadisə nəticəsində 2 nəfər dünyasını dəyişib, 3 nəfər xəsarət alıb. Ölənlər Xaçmaz rayon Şollar kənd sakini 1960-cı il təvəllüdlü Şahmirov İmamverdi Minabəddin oğlu, Bakı şəhər sakini 1947-cı il təvəllüdlü Hacıyev Akif Hacıbaba oğludur. Xəsarət alanlar “Nissan”-ın sürücüsü Xaçmaz rayon Köhnə Xudat kənd sakini Elşad İbrahimov, Xaçmaz Regional Poçt şöbəsinin əməkdaşları - 1965-ci il təvəllüdlü Nazim Hacıyev və 1960-cı il təvəllüdlü Cavid Məmmədovdur.

Xaçmaz rayon Xəstəxanasından Lent.az-a verilən məlumata görə, meyitlər tibbi ekspertizadan keçiriləndə sonra ailələrinə təhvil verilib.

Xəsarət alanlardan Cavid Məmmədov ilkin tibbi yardımdan sonra evə buraxılıb.

Xaçmaz rayon Polis Şöbəsinin müstəntiqi Ramin Babayev Lent.az-a bildirib ki, qəzanın baş vermə səbəbləri araşdırılır.

Faktla bağlı cinayət işi qaldırılıb, araşdırmalar davam etdirilir.

Vəli Turan