Qəhrəmanlar unudulmur – Milli Qəhrəmanlar Sahil Məmmədov və Canbulaq Rzayev

Lent.az da bu təşəbbüsə qoşulur və Milli Qəhrəmanların doğum günlərində onlar haqqında məlumatları dərc edir.

Qəhrəmanlar unudulmur!

Sahil Ələmdar oğlu Məmmədov 1964-cü il fevralın 25-də Qərbi Azərbaycanın Uluxanlı (Masis) rayonu Yuxarı Necili (Nizami) kəndində anadan olub. O, Birinci Qarabağ müharibəsində fəal iştirak edib, Zəngilan rayonu ərazisində zastava rəisi olub, Qazançı, Ağkənd, Dərəli kəndlərinin müdafiəsində qəhrəmanlıqla vuruşub, Qazançı kəndinin müdafiəsi zamanı ağır yaralanıb. Birinci qrup Qarabağ müharibəsi əlilidir, hazırda DİN-nin Pasport, Viza və Qeydiyyat İdarəsində baş inspektor vəzifəsində çalışır.

Canbulaq (Canpolad) Yaqub oğlu Rzayev 1968-ci il fevralın 26-da Ağdam rayonu Əhmədavar kəndində anadan olub. Leytenant C.Rzayev Xramort, Xanabad, Əsgəran, Qarakənd, Gülablı kəndləri uğrunda gedən döyüşlərdə bir komandir kimi rəşadətlə vuruşub. 1992-ci il fevralın 26-da C.Rzayev öz tankı ilə Xocalıda qətlə yetirilən insanların köməyinə gedib, düşmənin atəş mövqelərini məhv edərək xeyli insanın xilas olmasına şərait yaradıb, axıra qədər döyüşüb və şəhid olub. Məzarı Ağdam şəhərinin Şəhidlər Xiyabanındadır.