Bakıda valyutadəyişmə məntəqəsinə silahlı basqın edildi

Məntəqənin əməkdaşı yaralanıb

Azərbaycan paytaxtında valyutadəyişmə məntəqəsinə silahlı basqın olub. APA-nın xəbərinə görə, hadisə Bakının Nərimanov rayonunda, Atatürk prospektində “Debütbank”ın 24 saylı valyutadəyişmə məntəqəsində qeydə alınıb.

Hadisə yerinə hüquq-mühafizə orqanlarının əməkdaşları, Bakı Şəhər Baş Polis İdarəsinin rəis müavini Elxan Həsənov, Daxili İşlər Nazirliyinin yüksək rütbəli nümayəndələri gəlib.

E. Həsənov APA-nın hadisə yerində olan əməkdaşına bildirib ki, silahlı basqın nəticəsində ölən olmayıb. Rəis müavini faktla bağlı araşdırma getdiyini deyərək ətraflı açıqlama verməyib.

Bununla belə, APA-nın əməkdaşı valyutadəyişmə məntəqəsinin ətrafında yerdə qan izlərini müşahidə edib. Şahidlərin sözlərinə görə, silahlı basqın nəticəsində yaralanan var. Basqın zamanı məntəqədən pul aparılıb-aparılmadığı da məlum deyil.

Nərimanov rayon Polis İdarəsinin 16-cı Polis Bölməsindən APA-ya verilən məlumata görə, silahlı basqın nəticəsində yaralanan şəxs valyutadəyişmə məntəqəsinin əməkdaşı 1988-ci il təvəllüdlü Tərlan Məlikovdur. O, Klinik Tibbi Mərkəzə yerləşdirilib.

Mərkəzdən APA-ya T. Məlikovun baş və üz nahiyəsindən kəsilmiş-deşilmiş bıçaq xəsarəti aldığı, vəziyyətinin kafi olduğu bildirilib.