“Meşə qardaşları”na hökm oxundu

Cinayətkar dəstə üzvlərinə ağır həbs cəzası verilib

Bu gün Ağır Cinayətlərə Dair İşlər üzrə Məhkəmədə “Meşə qardaşları” adlı qruplaşma yaradaraq bir sıra cinayətlər törətməkdə, o cümlədən Nərimanov rayonunda yerləşən “Əbu-Bəkr” məscidində terror aktı törətməkdə təqsirləndirilən 26 nəfərdən ibarət mütəşəkkil dəstənin cinayət işi üzrə məhkəmə prosesində hökm oxunub.

Lent.az-ın müxbirinin verdiyi məlumatına görə, təqsirləndirilən Elnur Bəşirov 15 il (3 ilini Qobustan qapalı tipli cəza müəssisəsində keçirməklə), Qüdrət Məlikov 15 il, Xalid Vəlimətov 14 il, Ülfət Məlikov 13 il, Vahid Əsədov 15 il, Rusiya vətəndaşı Maqomed İsayev 15 il, Kamran Bozargi 8 il, Zabit Şıxbabayev 7 il, Samir Mehdiyev 8 il, Anar Vəlimətov 8 il, Fariz Məmmədov 8 il, Rasim İsgəndərov 8 il, Elşən Allahverdiyev 8 il, Taleh Məhərrəmov 8 il, Rafiq Ağacanov 6 il, Azər Baxışov 6 il , Zaur Cəfərova 6 il, Teymur Nərimanov 6 il, Aleksandr Nurəliyev 5 il 6 ay, Musa Orucov 5 il, Məmməd Məmmədov 5 il 6 ay, Elxan Osmanov 6 il, Rüfət Rzayev 5 il 6 ay, Sərdar Bünyadov 5 il 6 ay, Türkiyə vətəndaşları Yamin Ali 6 il, Özdəmir Ergin isə 2 il müddətinə azadlıqdan məhrum ediliblər.

Qeyd edək ki, təqsirləndirilən şəxslər Zaqatala rayonundan olan “Əbdülməcid” ləqəbli İlqar Mollaçiyev, onun qaynı “Süleyman” ləqəbli Samir Mehdiyevlə cinayət əlaqəsinə girərək, Azərbaycanda iğtişaş yaratmaq, dövlət quruluşu əleyhinə fəaliyyət göstərmək istəyiblər. Onlar “Əbu-Bəkr” məscidində partlayış törətməkdə və digər cinayətkar əməllərdə təqsirləndiriliblər.

Onlar Azərbaycan Respublikası Cinayət Məcəlləsinin 214-cü (terrorçuluq), 120-ci (qəsdən adamöldürmə), 279-cu (qanunvericilikdə nəzərdə tutulmayan silahlı birləşmələri və ya qrupları yaratma), 228-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) və digər maddələri ilə ittiham olunublar.

Fərid Əkbərov