Narkotik alverçisinə 11 il həbs cəzası verildi

Oktyabrın 30-da Ağır Cinayətlərə Dair İşlər üzrə Məhkəmədə narkotik alverində təqsirləndirilən Biləsuvar rayonu sakininin cinayət işi üzrə məhkəmə prosesi başa çatıb.

Lent.az-ın məlumatına görə, hakim İlham Mahmudovun sədrliyi ilə keçirilən prosesdə təqsirləndirilən Rasim Əhmədova hökm oxunub. Hökmə əsasən Ə.Əhmədov 11 il müddətinə azadlıqdan məhrum edilib.

İttihama görə, 2009-cu ilin avqustun 7-də Rasim Əhmədov Biləsuvar rayonu ərazisində adı istintaqa bəlli olmayan İran vətəndaşından dəyəri 30 min manat olan külli miqdarda narkotik maddə sayılan heroin alıb. Aldığı heroini avqustun 12-də Bakı şəhərində satmaq istəyərkən tutulub. R.Əhmədov Azərbaycan Respublikası Cinayət Məcəlləsinin 234.2-ci (satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri satma) və 234.4.3-cü (külli miqdarda törədildikdə) maddələri ilə təqsirli bilinib.

Fərid Əkbərov