Arvadını öldürən maştağalının məhkəməsi başlayıb

Oktyabrın 30-da Ağır Cinayətlərə Dair İşlər üzrə Məhkəmədə qısqanclıq zəminində həyat yoldaşını öldürməkdə təqsirləndirilən Bakı şəhəri sakininin məhkəməsi başlayıb.

Lent.az-ın məlumatına görə, hakim Fikrət Qəribovun sədrliyi ilə keçirilən prosesdə təqsirləndirilən Ağakişi Tağıyev ona qarşı irəli sürülən ittihamla özünü qismən təqsirli bilib və törətdiyi əməldən peşman olduğunu söyləyib.

İttihama görə, 2009-cu ilin avqustun 18-də Bakı şəhəri Sabunçu rayonu Maştağa sakini A. Tağıyev evində qısqanclıq zəminində arvadı Zahidə Tağıyevanı boğaraq qətlə yetirib və könüllü polisə təslim olub. O, Azərbaycan Respublikası Cinayət Məcəlləsinin 120.1-ci (Qəsdən adam öldürmə, yəni digər şəxsi qəsdən həyatdan məhrum etmə) maddəsi ilə ittiham olunur.
Fərid Əkbərov