16 yaşlı qızı zorlamaq istədi, 6 il həbs cəzası aldı

Göygöl sakininin istəyi başına bəla olub

Oktyabrın 19-da Ağır Cinayətlərə Dair İşlər üzrə Məhkəmədə 16 yaşlı qızı zorlamağa cəhddə ittiham olunan Göygöl rayon sakininə hökm oxunub.

Lent.az-ın məlumatına görə, hakim Rauf Əliyevin sədrliyi ilə qapalı keçirilən prosesdə məhkəmə təqsirləndirilən Yamin Mehdiyevin törətdiyi cinayət əməlinin sübuta yetirildiyi qənaətinə gəlib. Məhkəmə hökmü ilə Y.Mehdiyev Azərbaycan Respublikası Cinayət Məcəlləsinin 29. 149.2.3-cü (zorlama, təqsirkar şəxs üçün aşkar surətdə yetkinlik yaşına çatmayan şəxsə qarşı cəhd) maddəsi ilə təqsirli bilinərək 6 il müddətinə azadlıqdan məhrum edilib.

Xatırladaq ki, keçən prosesdə dövlət ittihamçısı Y.Mehdiyevin 7 il 6 ay müddətinə azadlıqdan məhrum edilməsini istəyib.

Qeyd edək ki, hadisə 2009-cu ilin iyun ayında baş verib. Göygöl rayonu Quşçu kənd sakini 1985-ci il təvəllüdlü Y. Mehdiyev həmkəndlisi 1993-cü il təvəllüdlü Aytən Baxışovanı (şərtidir) zorlamağa cəhd göstərib.

Fərid Əkbərov