“GEN” MMC-nin məhkəməsində bir-birinə zidd ifadələr verilir

Oktyabrın 12-də Ağır Cinayətlərə Dair İşlər üzrə Məhkəmədə “GEN” MMC-nin cinayət işi üzrə məhkəmə prosesi keçirilib.

Lent.az-ın məlumatına görə, hakim Eynulla Vəliyevin sədrliyi ilə keçirilən prosesdə təqsirləndirilən Elbrus Əliyevin vəsatəti üzrə əlavə şahid qismində “Əkinçi” media qrupunda əvvəllər prodüser işləmiş Səadət Hüseynova dindirilib. E.Əliyev S.Hüseynovaya reklam yerləşdirmək üçün 51 min manat verdiyini bildirib. S.Hüseynova isə E. Əliyevin yalan danışdığını söyləyib. Şahid həmin vaxt “GEN” MMC-nin televiziyalarda 4 min manatlıq reklamlarının yayımlandığını, lakin E.Əliyevin pul ödəmədiyini və əvəzində onlara tikiləcək mənzillərdən birini verəcəyi haqda söz verdiyini bildirib.

Zərərçəkənlərin vəkili Vidadi İsgəndərov isə “Əkinçi” media qrupun rəhbəri Şakir Eminbəylinin məhkəməyə dəvət olunması haqqında vəsatət qaldırıb. Məhkəmə vəsatəti təmin etməyib.

Sonra prosesdə əlavə şahid qismində “Müstəqil Hüquqşünas” qəzetinin baş redaktoru Ələsgər Rüstəmov ifadə verib. E.Əliyev Ə.Rüstəmova 3 evin qiymətləndirilməsi və bankdan kredit götürülməsinə görə 30 min manat pul verdiyini söyləyib. Ə.Rüstəmov isə E.Əliyevindən pul almadığını, əksinə E.Əliyevin onun adından istifadə edərək Beton zavodundan beton aldığını və pulunu da vermədiyini bildirib.

Daha sonra zərərçəkmiş qismində Elbrus Məmmədov ifadə verib. O, mənzil almaq üçün 17760 manat pul ödədiyini söyləyib: “Pulumu tələb edəndə Ələsgər Rüstəmov mənə dedi ki, pulum batmayacaq”.

Proses oktyabrın 13-də sənədlərin elan olunması ilə davam etdiriləcək.

Qeyd edək ki, təqsirləndirilənlər Əliyev Elbrus Bulud oğlu, Abbasov Əliyar Qənbər oğlu, Ağayev Həbib Məmmədağa oğlu, Məmmədov Nəbi Ağarəhim oğlu, Cəfərzadə Mehparə Mahmud qızı, Ələmov Asif Meyli oğlu, Səfərov İlkin Məzahir oğlu, Əliyev Ramil Saday oğlu və Əhmədov Kamran Sabir oğlu Azərbaycan Cinayət Məcəlləsinin 178.3.1 (dələduzluq – mütəşəkkil dəstə tərəfindən törədildikdə) və 178.3.2 (dələduzluq – külli miqdarda ziyanla törədildikdə) maddələri ilə ittiham olunurlar.

Cinayət işi üzrə 10 nəfər şəxs təqsirləndirilir, 373 nəfər zərərçəkmiş kimi tanınıb.

Fərid Əkbərov