Qubada torpaq sürüşməsi baş verib
09 oktyabr 2009 10:30 (UTC +04:00)

Qubada torpaq sürüşməsi baş verib

Quba – Xınalıq yolunun 44-cü kilometrliyində yerləşən Cek kəndi ilə üzbəüz ərazidəki zonada torpaq sürüşməsi baş verib. Bu haqda Lent.az-a Quba Yol İstismarı İdarəsinin rəisi Aydəmir Manafov məlumat verib.

Onun sözlərinə görə, sürüşmə yoldan təqribən 300 metr kənarda baş verdiyindən, yola heç bir təsiri olmayıb.

Bununla belə, A.Manafov uçqunun daha geniş miqyası əhatə edəcəyi təqdirdə, qarşısının alınmasının mümkünsüzlüyünü bildirib: “Uçqunun qarşısını Allahdan başqa heç nə ala bilməz. Orada uçqun zonası böyük ərazini tutur. Ərazinin hamısı sürüşsə, önünü heç bir texnika ilə kəsmək mümkün olmayacaq. Bu il Qubada hava şəraiti o qədər də yaxşı olmadı. Sürüşmə də son günlər yağan güclü yağışlar üzündən baş verib. Amma sürüşmənin yola və yaxınlıqdakı yaşayış məntəqəsinə təsiri olmayıb. Hazırda həmin ərazidə insanların gediş-gəlişi üçün heç bir problem yoxdur”.

Elşən
# 373

Oxşar yazılar