“MTN hər hansı jurnalistin həbsi üçün əməliyyat keçirməyib”

Arif Babayev: “MTN-də jurnalist saxlanılmır”

“Milli təhlükəsizlik orqanları hər hansı jurnalistin həbs olunması üçün əməliyyat keçirməyib. Pia.az saytının baş redaktorunun müavini Ravil Məmmədovun Milli Təhlükəsizlik Nazirliyinin keçirdiyi əməliyyat nəticəsində həbs olunması barədə yayılan məlumatlar həqiqətə uyğun deyil”.

Bunu APA-nın sorğusuna cavab olaraq, MTN ictimai əlaqələr mərkəzinin rəhbəri Arif Babayev deyib. A. Babayev qeyd edib ki, Milli Təhlükəsizlik Nazirliyinin belə bir əməliyyat keçirməsi və jurnalisti həbs etməsi barədə məlumatlar yalandır.

“Adı çəkilən jurnalist də MTN-də saxlanılmır”, - deyən A. Babayev MTN-in PİA-nın baş redaktoru Şahin Ağabəylinin təqib etdiyi barədə məlumatları da qətiyyətlə təkzib edib.

Qeyd edək ki, PİA-nın baş redaktoru Şahin Ağabəyli mətbuata Ravil Məmmədovun MTN tərəfindən həbs olunduğu, onun özünün həbsi ilə bağlı tədbirlərin görüldüyü barədə açıqlama verib.