3 məhkəmə hakiminə töhmət verildi

Bir hakim barəsində isə intizam icraatı başlanılıb

Məhkəmə-Hüquq Şurasının növbəti iclası keçirilib.

Bu barədə APA-ya Məhkəmə-Hüquq Şurasından məlumat verilib.

Məlumatda bildirilir ki, şuranın sədri, ədliyyə naziri Fikrət Məmmədovun sədrliyi ilə keçirilən iclasda məhkəmə fəaliyyətinin təkmilləşdirilməsi barədə dövlət başçısının tapşırıqlarına əsasən görülən tədbirlərin ədalət mühakiməsinin səmərəliyinə əsaslı təsir göstərdiyi, yol verilən bir çox nöqsanların qarşısının qətiyyətlə alındığı, şikayətlərin sayının xeyli azaldığı qeyd olunub.

İclasda bununla belə bəzi hakimlər tərəfindən qanunvericiliyin tələblərinin pozulması hallarının hələ də davam etdirildiyi bildirilib. Hakimlər barədə başlanılmış intizam icraatlarına baxılaraq qanunvericiliyin tələblərini pozduqlarına görə Bakı şəhəri Nizami rayon Məhkəməsinin hakimi Şahin Atakişiyevə, Binəqədi rayon Məhkəməsinin hakimi Rəsmiyyə Hüseynovaya və Gədəbəy rayon Məhkəməsinin hakimi Hüseyn Hüseynova töhmət verilib.

Həmçinin, Şurada qanunvericiliyin tələblərinin pozulması hallarına yol verdiyinə görə, bir hakim barəsində intizam icraatı başlanılıb.